சுங்கச் சாவடிகளில் கட்டணம் வசூல் பிரச்னை: முதல்வர் மூலம் மத்திய அரசை வலியுறுத்தி தீர்வு- அமைச்சர் உறுதி

நாமக்கல், ஜூலை 19: தேசிய நெடுஞ்சாலைகளில் உள்ள சுங்கச் சாவடிகளில் கட்டணம் வசூல் தொடர்பாக ஏற்பட்டுள்ள பிரச்னைக்கு, தமிழக முதல்வர் மூலம் மத்திய அரசை வலியுறுத்தி தீர்வு காண நடவடிக்கை எடுப்பதாக தமிழக போக்குவரத்து துறை அமைச்சர் கே.என். நேரு உறுதியளித்தார்.

÷அசோக் லேலண்ட் நிறுவனத்தின் சார்பில், வாகன ஓட்டுநர்களின் குழந்தைகளுக்கான மாநில அளவிலான கல்வி உதவித்தொகை வழங்கும் திட்டத்தை நாமக்கல்லில் துவக்கி வைத்து அவர் பேசியது:

÷லாரி உரிமையாளர்களுக்கு உள்ள பிரச்னைகளில் முக்கியமான பிரச்னையாக இருப்பது சுங்கக் கட்டணம் வசூல். லாரி உரிமையாளர்களுக்கு மட்டுமின்றி அரசுப் பேருந்துகள் உள்பட அனைத்து வாகன உரிமையாளர்களுமே ஒவ்வொரு சுங்கச் சாவடியிலும் ஒவ்வொரு முறையில் சுங்கம் வசூலிப்பதால் பாதிப்புகள் உள்ளன. ஒரு அரசுப் பேருந்து நாளொன்றுக்கு ரூ. 910 செலுத்த வேண்டியுள்ளது. முன்பு ஒருமுறை சுங்கம் செலுத்தினால் 24 மணி நேரத்துக்கு எத்தனை முறையும் சென்று வரலாம். ÷தற்போது, ஒவ்வொரு முறை சென்று வருவதற்கும் கட்டணம் செலுத்த வேண்டியுள்ளது. இந்தியாவில் உள்ள சுங்கச் சாவடிகளின் எண்ணிக்கையில் 70 சத சுங்கச் சாவடிகள் தமிழகத்தில் தான் உள்ளன.

÷ தமிழகத்தில் உள்ள தேசிய நெடுஞ்சாலைகள் அனைத்திலும் 4 வழிப்பாதை கொண்டுவரப்பட்டுள்ளதால் சுங்கச் சாவடிகள் எண்ணிக்கை அதிகரித்துள்ளது. சுங்கம் வசூலிப்பது மத்திய அரசு கட்டுப்பாட்டில் உள்ளது. இதற்காக மத்திய அரசின் சட்டமும் உள்ளது. இந்த சட்டத்தை மத்திய அரசு உடனடியாக மாற்றவும் முடியாது. வேண்டுமானால் மானியம் வழங்கலாம். இருப்பினும், கட்டண வசூலில் உள்ள பிரச்னைகளை தமிழக முதல்வர் மூலம் மத்திய அரசுக்கு எடுத்துக் கூறி தீர்வு காண நடவடிக்கை எடுக்கப்படும்.

÷ஓட்டுநர்களின் நலனுக்காக தமிழக அரசு பல்வேறு திட்டங்களை செயல்படுத்தி வருகிறது. 12 சத ஊதிய உயர்வு, 20 சத போனஸ், ஓய்வூதிய பலன், பண்டிகை கால பணம், கல்விக்கான முன் பணம், ஓட்டுநர்களின் குழந்தைகள் மருத்துவக் கல்லூரி, பொறியியல், கல்லூரி, பாலிடெக்னிக்குகளில் சேர தனியாக கல்லூரிகளும் நடத்தப்படுகிறது. நாட்டின் பொருளாதாரத்தில் முக்கிய அங்கம் வகிக்கும் வேளாண்மை, ஜவுளி, கட்டுமானம் ஆகியவற்றை இயக்குவதை சாலைப்போக்குவரத்து என்பதை மறுக்க முடியாது.

÷ எனவே, சாலைப் போக்குவரத்தில் ஈடுபட்டுள்ள லாரி உரிமையாளர்களின் பிரச்னைகளுக்கு மாநில அரசு மூலமும், மத்திய அரசு மூலமும் கிடைக்க வேண்டியதை பெற்றுத் தரப்படும் என்றார் அவர்.