மது அருந்திய ஆசிரியரை “டிஸ்மிஸ்” செய்யலாம் ஐகோர்ட்டு அதிரடி தீர்ப்பு

வேலூரைச் சேர்ந்த முதுநிலை பட்டதாரி ஆசிரியர் ஜான்பாஸ்கோ ஆர்.சி.எம். பள்ளியில் பணியாற்றி வந்தார். இவர் கடந்த 1992-ம் ஆண்டு பள்ளி நிர்வாகத்தால் டிஸ்மிஸ் செய்யப்பட்டார். இதை எதிர்த்து ஜான்பாஸ்கோ ஐகோர்ட்டில் வழக்கு தொடர்ந்தார். அதில் கூறி இருந்ததாவது:-

எனக்கு அதிக ரத்த அழுத்தம் இருந்ததாகவும், மது அருந்தியதாகவும் பள்ளி நிர்வாகம் டிஸ்மிஸ் செய்தது. பள்ளியில் கொடுக்கப்பட்ட அதிக பணி சுமைதான் எனது ரத்த அழுத்தம் உயர்வதற்கு காரணம் ஆகும்.

எனது இயலாததன்மையை கருத்தில் கொண்டு மாற்றுத் திறனாளியாகி கருதி எனக்கு பள்ளியிலேயே தகுந்த வேலை ஒதுக்கி தரவும், என்னை பள்ளி நிர்வாகம் “டிஸ்மிஸ்” செய்த உத்தரவை ரத்து செய்ய வேண்டும்.

இவ்வாறு அதில் கூறி இருந்தார்.

இந்த வழக்கு நீதிபதி பால்வசந்தகுமார் முன்பு விசாரணைக்கு வந்தது. அப்போது பள்ளியின் சார்பில் விளக்கம் அளித்தனர். அதில், ஆசிரியர் ஜான்பாஸ்கோ தினமும் மது அருந்தி விட்டுத்தான் பள்ளிக்கு வருவார். பாடம் நடத்த முடியாமல் மாணவர்கள் முன்பு தள்ளாடுவார். கரும்பலகையில் எழுத முடியாமல் அவரது கைகள் உதறும். எனவே அவரது நடவடிக்கைகள் வருங்கால தூண்களான மாணவ-மாணவிகள் கெட்ட நடவடிக்கைகளுக்கு தூண்டும் என்பதால் டிஸ்மிஸ் செய்தோம் என்று தெரிவிக்கப்பட்டு இருந்தது.

இரு தரப்பு வாதங்களையும் கேட்ட நீதிபதி பால்வசந்த குமார் அளித்த தீர்ப்பு வருமாறு:-

பள்ளிகள், கல்லூரிகள் உள்ளிட்ட கல்வி நிறுவனங்களில் பணியாற்றும் அலுவலர்கள் மற்றும் ஆசிரியர்களின் ஒழுங்கீன செயல்களை ஒரு போதும் ஏற்றுக் கொள்ள முடியாது. இந்த நீதிமன்றம் இது போன்ற பல்வேறு வழக்குகளை விசாரித்துள்ளது.

மது அருந்திய ஆசிரியர்கள் மற்றும் ஒழுங்கீனமானவர்களின் செயல்களை ஏற்றுக் கொண்டால் அது மாணவர்களின் கல்வியையும், பள்ளியையும் பாதிக்கும். கல்விப்பணிக்கு களங்கம் ஏற்படும். எனவே மது அருந்தி பள்ளிக்கு வந்த ஆசிரியரை “டிஸ்மிஸ்” செய்தது செல்லும். அதே நேரத்தில் பென்சன் உள்ளிட்ட சலுகைகளை உடனடியாக வழங்க வேண்டும்.

இவ்வாறு அவர் தீர்ப்பு கூறினார்.