முழுமையாக ஆக்ஷன் ஹீரோவாக நடிக்க ஆசை : ஜெய்

ஆக்ஷன் இமேஜுக்கு முன்னோட்டமாக ‘வாமனன்õ படத்தில் நடித்தேன். இனி அதிரடி ஆக்ஷன் படங்களில் நடிக்கவே விரும்புகிறேன்' என்கிறார் ஜெய்.
இரண்டு ஹீரோ கதைகளில் நடிப்பது தொடருமா?

இனிமேல் அப்படி நடிக்க மாட்டேன். ஆனால் வெங்கட்பிரபு கேட்டால் நடிப்பேன். அதற்கு காரணம் அவர் மீது எனக்கு இருக்கும் நம்பிக்கைதான். நான்கு ஹீரோக்களை வைத்து அவர் கதை செய்தாலும் என்னுடைய கேரக்டரை நன்றாக வெளிப்படுத்தும் அளவுக்கு காட்சிகள் வைப்பார். மற்ற யார் கூப்பிட்டாலும் இதுபோன்ற கதைகளில் நடிக்க மாட்டேன்.

சசிகுமார் அழைத்தால்?

அவர் என்னுடன் நடிப்பதாக இருந்தால் நடிப்பேன்.

நல்ல கதைகள் வரும்போது ஹீரோக்கள் சேர்ந்து நடித்தால் என்ன?

எனக்கென இமேஜ் உருவாக்க விரும்புகிறேன். அப்படி இமேஜுடன் நடித்து முன்னணி நடிகராக வேண்டும். அதன் பின் ஒன்றுக்கு மேற்பட்ட ஹீரோ கதைகளில் நடிப்பதில் ஆட்சேபனை இல்லை.

தொடர்ந்து சாக்லெட் ஹீரோவாக நடிக்க முடிவா?

இல்லை. ஆக்ஷன் ஹீரோவாக நடிக்க வேண்டும் என்று முடிவு எடுத்திருக்கிறேன். அதற்காக சண்டை பயிற்சிகள் எல்லாம் எடுத்து தயாராக இருக்கிறேன். ‘வாமனன்' படமே ஆக்ஷன் கலந்த கதைதான். முழுமையாக ஆக்ஷன் ஹீரோவாக நடிக்க ஆசை உள்ளது. நான் வெளியூர்களுக்கு ஷூட்டிங் போகும் போது அங்கு ரசிகர்களை சந்திக்கிறேன். அவர்களும் ஒரு ஆக்ஷன் படமாவது நடியுங்கள் என்று கேட்கிறார்கள். முதல் கட்டமாக இயக்குனர்கள் பேரரசு, ஏ.வெங்கடேஷ் இருவரும் என்னை இயக்க கேட்டிருக்கிறார்கள். அதற்கான பேச்சுவார்த்தை நடக்கிறது.

நடித்து வரும் படம்?

‘கனிமொழி' படத்தில் நடித்து வருகிறேன். நல்ல கதைகளுக்காக காத்திருக்கிறேன். படம் முடிவானதும் தெரிவிப்பேன்.