ஆசிரியர் சேவை செய்ய ஆசைப்பட்டு பதவியை உதறினார் எம்.எல்.ஏ.,

ஜெய்ப்பூர் : ஆசிரியர் வேலை கிடைத்தால் பதவியை ராஜினாமா செய்யப்போவதாக
ராஜஸ்தான் எம்.எல்.ஏ., ஒருவர் அறிவித்துள்ளார்.அரசியல்வாதிகளின்
குறைந்தபட்ச கனவே எப்படியாவது எம்.எல்.ஏ., ஆகிவிடவேண்டும் என்பதாகத்தான்
இருக்கும். ஆனால் இதிலிருந்து முற்றிலும் மாறுபட்டு, ராஜஸ்தானை சேர்ந்த
பா.ஜ., எம்.எல்.ஏ., ஒருவர் ஆசிரியர் வேலைக்காக பதவியை ராஜினாமா
செய்யப்போவதாக அறிவித்துள்ளார்.

பாசேரி தொகுதியின் பா.ஜ.,
எம்.எல்.ஏ.,வாக பதவி வகிப்பவர் சுக்ராம் கோலி. இவர் முதுகலை பட்டதாரி
ஆவார். மேலும் எம்.பில்., பட்டமும், பி.எட்., ஆசிரியர் பட்டயப்படிப்பையும்
முடித்துள்ளார்.இந்த நிலையில் ராஜஸ்தான் அரசு பணியாளர் தேர்வாணையம்
சார்பில் சமீபத்தில், முதுகலை ஆசிரியர் பணியிடங்களுக்கான போட்டித்தேர்வு
நடத்தப்பட்டது. இத்தேர்வில் அம்மாநிலத்தை சேர்ந்த 33 ஆயிரம் பேர்
கலந்துகொண்டனர். அதில் எம்.எல்.ஏ., சுக்ராம் கோலியும் கலந்துகொண்டு தேர்வு
எழுதினார்.

இதுகுறித்து எம்.எல்,ஏ., சுக்ராம் கோலி கூறியதாவது,எனது
தொகுதியில் மக்களுக்காக பல்வேறு வளர்ச்சிப் பணிகளை மேற்கொள்ளவேண்டும் என்ற
கனவுடன் எம்.எல்.ஏ., பதவிக்கு போட்டியிட்டு வெற்றிபெற்றேன். ஆனால் எனது
தொகுதி கொள்ளையர்கள் ஆதிக்கம் மிகுந்த பகுதி. எனவே இங்கு வளர்ச்சிப் பணிகளை
மேற்கொள்வது இயலாத காரியம் என அறிந்துகொண்டேன்.இதற்குமேல் நான்
எம்.எல்.ஏ., பதவியில் நீடிப்பதில் அர்த்தமில்லை. எனவே ஆசிரியர் வேலை
கிடைத்தால் எனது பதவியை ராஜினாமா செய்ய தயாராக உள்ளேன். ஆசிரியர் வேலையில்
சேர்ந்தால் குழந்தைகளுக்கு சிறந்த கல்வியை போதித்து இந்த பகுதியின்
சூழ்நிலையை மாற்ற முயற்சிப்பேன். எனக்கு வேலை கிடைத்தால் 22 ஆயிரம் ரூபாய்
சம்பளம் கிடைக்கும். என் குடும்பத்தை நடத்துவதற்கு அது போதுமானது.
இந்தியாவின்
முதல் ஜனாதிபதி ராஜேந்திர பிரசாத், ஜாகீர் உசேன், லால் பகதூர் சாஸ்திரி
ஆகியோர் என்னை கவர்ந்த தலைவர்கள். முன்னாள் பிரதமர் அடல் பிகாரி வாஜ்பாய்
எனக்கு முன்மாதிரி தலைவராக கருதுகிறேன்.இவ்வாறு சுக்ராம் கோலி கூறினார்.

அடேங்கப்பா அரசியல்ல சில நல்ல மனுசங்களும் இருக்காங்க