எல்லா மொழியிலும் கதைதான் ஹீரோ பூர்ணாவின் சமாளிபிகேஷன்!

ஒரு மேடை, இரு நடிகைகள்... ம்கூக்கும் என்று முறுக்கிக் கொள்ளவும், ஹையோ என்று அலுத்துக் கொள்ளவும்தான் நிறைய வாய்ப்புகள் இருக்கும். ஆனால் மோனிகாவும் பூர்ணாவும் அப்படி ஒரு பிரண்ட்ஷிப் காட்டிக் கொண்டார்கள் நமக்கு முன்னே! இடம்- நரன் பட பூஜை. நேரம்-இரண்டு நடிகைகள் ஓரிடத்தில் இருந்தால் அதுவே ஐஸ்கட்டி நேரம்தானே!

சிலந்தி பட இயக்குனர் ஆதியின் அடுத்த படம்தான் நரன். பொதுவாக புதிய ஹீரோக்களுடன் ஜோடி சேர்வதில்லை என்பதை கொள்கையாகவே வைத்திருக்கும் பூர்ணா, முதலில் ஆதி கதை சொல்ல நேரம் கேட்டபோது இதை சொல்லிதான் மறுத்தாராம். விடாப்பிடியாக வற்புறுத்திய பின்தான் கதை கேட்க நேரம் ஒதுக்கினார். கேரளாவுக்கே போய் கதை சொன்ன ஆதி, ஸ்பாட் அப்ரூவலோடு சென்னைக்கு திரும்பினாராம். (பூர்ணாவுக்கே இம்புட்டு கஷ்டமா?) நான் அடுத்த பட ஷ§ட்டிங்குக்கு போவதை கூட மறந்து கதை கேட்டேன். அதுவே தனி அனுபவம் என்றார் பூர்ணா. தமிழ், தெலுங்கு, மலையாளம், ஹிந்தி என்று எங்கே போனாலும் கதைதான் ஹீரோ. அதனால்தான் இந்த படத்தில் நியூ ஃபேஸ் என்றாலும் நடிக்க ஒப்புக் கொண்டேன் என்றார்.

இரண்டு ஹீரோயின் சப்ஜெக்ட் என்றாலும் எனக்கான முக்கியத்துவம் நிச்சயம் இதில் இருக்கும் என்றார் மோனிகா. எங்க டைரக்டர் என்று அவர் சொல்லும்போதே அந்த முக்கியத்துவம் அவருக்கு கிடைக்கும் என்பது நமக்கும் புரிந்தது. 'நரன்' என்றால் மனிதன் என்று அர்த்தம். சக மனிதர்கள் நரன் என்று அழைத்துக் கொள்வதில்லை. ஆனால் நம்மைவிட சுப்பீரியர் சக்திகள், மனிதர்கள் குறித்து பேசும்போது நரன் என்றுதான் அழைக்கிறார்கள். இந்த கதையும் த்ரில்லர் வகையை சேர்ந்ததுதான். அதோடு பிரமாதமான லவ்வும் இருக்கும் என்றார் படத்தின் இயக்குனர் ஆதி.

நரன் படத்தில் ஹீரோவாக நடிக்கிறார் புதுமுகம் அக்னீஷ்வரன்.