நாடாளுமன்றத்தில் மத்திய அரசை முடக்க தேசிய ஜனநாயக கூட்டணி திட்டம்

ஜூலை 5ம் தேதி நடத்திய நாடு தழுவிய பாரத் பந்த் போராட்டத்தைத் தொடர்ந்து, விலைவாசி பிரச்னையில் ஆளும் கூட்டணி அரசுக்கு நாடாளுமன்ற மழைக்காலக் கூட்டத் தொடரில் நிர்பந்தம் தருவது என தேசிய ஜனநாயகக் கூட்டணி திட்டமிட்டுள்ளது.
பெட்ரோல், டீசல் விலையை மத்திய அரசு உயர்த்தியதை அடுத்து அதை வாபஸ் பெறக்கோரி எதிர்க்கட்சிகள் போர்க்கொடி உயர்த்தியுள்ளன.
இடதுசாரிகளும் பாஜக தலைமையிலான தேசிய ஜனநாயக கூட்டணியும் தனித்தனியாக ஜூலை 5ம் தேதி பாரத் பந்த் போராட்டத்துக்கு அழைப்பு விடுத்தன.

இதில் சமாஜவாதி கட்சி, அதிமுக, மதிமுக போன்றவை பங்கேற்றன. நாடு தழுவிய அளவில் நடந்த இந்த போராட்டம் பல மாநிலங்களில் வெற்றிகரமாக அமைந்தது. இந்த போராட்டத்தின் மூலம் எதிர்க்கட்சிகளின் ஒற்றுமை வெளிப்பட்டுள்ளது என எதிர்க்கட்சிகள் மகிழ்ச்சியில் உள்ளன. ஆளும் கூட்டணி அரசுக்கு எதிரான எதிர்க்கட்சிகளின் இந்த ஒற்றுமை, மழைக்காலக் கூட்டத்தொடரிலும் வெளிப் படவேண்டும் என்பதில் முனைப்பாக உள்ளது தேசிய ஜனநாயக கூட்டணி. இந்நிலையில் சரத் யாதவ் நிருபர்களிடம் செவ்வாய்க்கிழமை கூறியதாவது: பெட்ரோல், டீசல் விலை உயர்வைக் கைவிடும்படி நாடாளுமன்றத்தில் குரல் எழுப்பும்போது பாரத் பந்த் போராட்டத்தில் பங்கேற்காத பகுஜன் சமாஜ் கட்சி, ராஷ்ட்ரீய ஜனதா தளம் ஆகியவையும் இணையும் என்று எதிர்பார்க்கிறோம்.

விலை உயர்வு என்பது ஒரு கட்சியை மட்டும் சார்ந்ததல்ல. மக்கள் சம்மந்தப்பட்ட பொதுப்பிரச்னையாகும். மக்களின் பிரச்னை மீது அக்கறை காட்டும் எல்லா கட்சிகளும் நாடாளுமன்றத்தில் ஆளும் கூட்டணிக்கு எதிராக நாங்கள் மேற்கொள்ளும் முயற்சிகளுக்கு துணை நிற்க வேண்டும். பெட்ரோல், டீசல் விலை உயர்வை வாபஸ் பெறும்படி ஆளும் கூட்டணி அரசை நாடாளுமன்றத்தில் நிர்பந்திக்க வேண்டும். இப்போதைய நிலையில் ஒரு கட்சியோ அல்லது தனி நபரோ தலைவரல்ல. நாம் எழுப்பும் பிரச்னைதான் பிரதானமானது. பிரச்னைகள் மீது எதிர்க்கட்சிகள் காட்டும் ஒற்றுமை எதிர்காலத்தில் மேலும் வலுப்பெறவேண்டும்.

நாடாளுமன்ற மழைக்காலக் கூட்டத்தொடரில் பெட்ரோல்,டீசல் விலை உயர்வு பிரச்னையில் எதிர்க்கட்சிகள் ஆளும் கூட்டணி அரசை கலங்கடிக்கவேண்டும்.

ஜூலை 5ம் தேதி நடந்த பாரத் பந்த் சுதந்திர இந்தியா இதுவரை பார்த்திராத ஒன்று. ஐக்கிய முற்போக்குக்கூட்டணி அரசின் 6 ஆண்டு கால ஆட்சியில் அதற்கு எதிராக நடத்தப்பட்ட முதல் மிகப்பெரிய போராட்டம் பாரத் பந்த்.

தலைபோகும் பிரச்னைகளை ஒதுக்கிவிட்டு இடதுசாரிகளும் பாஜகவும் ஒன்றாக சேர்ந்துவிட்டதாக காங்கிரஸ் கூறும் விமர்சனம் ஏற்கத்தக்கதல்ல. மதச்சார்பின்மை என்று கூறி முக்கிய பிரச்னைகளை மூடி மறைக்க பார்க்கிறது ஆளும் கூட்டணி அரசு. பற்றிஎரியும் பிரச்னைகளை மூடி மறைக்க மதச்சார்பின்மை கோஷத்தை எழுப்புகிறது காங்கிரஸ் தலைமையிலான கூட்டணி அரசு.

பாரத் பந்த் போராட்டத்தில் எதிர்க்கட்சிகள் இணைந்ததை கண்டு அதிர்ந்துபோயுள்ள காங்கிரஸ் கூட்டணி அரசு இந்த ஒற்றுமையை கலைக்க முயற்சிக்கக்கூடும் என்றார் சரத் யாதவ்.