மத்திய அமைச்சரவையில் சேர விருப்பமில்லை: பாஸ்வான்

மத்திய அமைச்சரவையில் சேர தனக்கு விருப்பமில்லை என்று தெளிவுபடுத்தி இருக்கிறார் லோக் ஜன சக்தி கட்சித் தலைவரும், மத்திய முன்னாள் அமைச்சருமான ராம்விலாஸ் பாஸ்வான்.

மத்திய அமைச்சரவையில் தான் விரைவில் சேரவுள்ளதாக வெளியான தகவல் ஆதாரமற்றது என்றும் அவர் தெரிவித்தார்.

மத்திய அமைச்சரவை விரைவில் மாற்றி அமைக்கப்படவுள்ளதாகவும், ராம்விலாஸ் பாஸ்வானுக்கு அமைச்சர் பதவி அளிக்கப்படவுள்ளதாகவும் செவ்வாய்க்கிழமை தகவல் பரவியது.

இதைத்தொடர்ந்து ராம்விலாஸ் பாஸ்வான், தில்லியில் புதன்கிழமை செய்தியாளர்களை சந்தித்து வெளியான தகவல் குறித்து விளக்கம் அளித்தார். அப்போது, நாடாளுமன்றத்துக்கு தான் அமைச்சராக செல்ல துளியும் விரும்பவில்லை என்று உறுதிபடத் தெரிவித்தார்.

நாடாளுமன்றத்தின் மேலவைக்கு அமைச்சராக செல்வதைவிட, எம்.பி.யாக சென்று தலித் மக்களுக்காகவும், ஏழைகளுக்காகவும் குரல் கொடுப்பதையே பெரிதும் விரும்புகிறேன். மேலவையில் தலித் பிரதிநிதிகள் சிலரின் பதவிக்காலம் நிறைவடைந்ததை அடுத்து தலித், ஏழைகளுக்கு ஆதரவாக குரல் ஒலிப்பது அரிதாகிவிட்டது. இதனால் மேலவையில் தலித்துகளுக்காகவும், ஏழைகளுக்காகவும் நான் குரல் கொடுக்க விரும்புகிறேன். இது எனது அரசியல் முடிவு என்றும் பாஸ்வான் தெரிவித்தார்.

வாழ்ந்தாலும், வீழ்ந்தாலும்... பிகாரில் வரும் சட்டப் பேரவைத் தேர்தலில் யாருடன் சேர்ந்து உங்களது கட்சி போட்டியிடும் என்று கேட்டதற்கு, லாலு கட்சியை தவிர யாருடன் சேர்ந்து போட்டியிடுவது? லாலு கட்சிக்கும் எங்களது கட்சிக்கும் இடையே வலுவான உறவு உள்ளது. எங்களது கூட்டணி உறுதியானது. இதை யாராலும் உடைக்க முடியாது. வாழ்ந்தாலும் வீழ்ந்தாலும் லாலு பிரசாத் தலைமையிலான ராஷ்ட்ரீய ஜனதா தளத்துடன்தான் என்பதில் உறுதியாகவுள்ளோம் என்றார் பாஸ்வான்.

பிகாரில் வரும் தேர்தல் மூலம் தங்களது கட்சிக்கு புத்துயிர் ஊட்ட காங்கிரஸôர் முயற்சிக்கின்றனர். ஆனால் லாலு கட்சியும், எனது கட்சியும் மாநிலத்தில் மீண்டும் ஆட்சியைப் பிடிக்க முயற்சிக்கின்றன. புத்துயிரூட்ட முயற்சிப்பதற்கும், வெற்றி பெற முயற்சிப்பதற்கும் வித்தியாசம் உள்ளது.

வரும் தேர்தலில் லாலு கட்சியும், எனது கட்சியும் வெற்றி பெற்று ஆட்சிக்கட்டிலில் அமர்வது உறுதி. இந்த வெற்றி சாதாரண வெற்றியாக இருக்காது. மூன்றில் இரண்டு பங்கு இடங்களை கைப்பற்றி அமோக வெற்றி பெறுவோம் என்றார்.

நினைத்துப் பாருங்கள்... பிகார் மாநில காங்கிரஸ் தலைவர் முஸ்லிம் மதத்தை சேர்ந்தவர் என்பதால் அந்த சமுதாயத்தின் வாக்குகள் அனைத்தும் அப்படியே காங்கிரஸýக்கே கிடைக்கும் என்று கூறப்படுகிறதே என்று கேட்டதற்கு, முஸ்லிம் மக்கள் அதிகம் வசிக்கும் அராரியா தொகுதிக்கு கடந்த ஆண்டு நடைபெற்ற இடைத் தேர்தலில் காங்கிரஸ் வேட்பாளரை எங்களது கட்சி சார்பில் நிறுத்தப்பட்ட பிற்படுத்தப்பட்ட வகுப்பைச் சேர்ந்த வேட்பாளர் தோற்கடித்தார். இதை நினைத்துப் பார்க்க வேண்டும் என்றார்.

மும்முனைப் போட்டி: முதல்வர் நிதீஷ்குமார், முன்னாள் முதல்வர் லாலு பிரசாத், ராம்விலாஸ் பாஸ்வான் ஆகியோர் அடங்கிய ஜனதா தளம் அசைக்க முடியாத சக்தியாக பிகாரில் இருந்துவந்தது. ஜனதா தளம் பிளவுபட்டு, ராஷ்ட்ரீய ஜனதா தளம், ஐக்கிய ஜனதா தளம், லோக் ஜனசக்தி என்று பிளவுபட்டது முதலே லாலு பிரசாதின் செல்வாக்கில் சரிவு ஏற்பட்டது குறிப்பிடத்தக்கது.

இப்போது புத்துணர்வுடன் ராகுல் காந்தியின் தலைமையில் காங்கிரஸ், வரவிருக்கும் சட்டப் பேரவைத் தேர்தலில் தனித்துப் போட்டியிட இருக்கும் சூழலில் நிதீஷ்குமார் தலைமையில் ஐக்கிய ஜனதா தளம் - பாரதிய ஜனதா கூட்டணியை எதிர்கொள்ள ராஷ்ட்ரீய ஜனதா தளம், ராம்விலாஸ் பாஸ்வானின் லோக் ஜன சக்தியுடன், காங்கிரஸ் கைகோர்க்கும் என்கிற எதிர்பார்ப்பு முற்றிலுமாக தகர்ந்து விட்டிருக்கிறது.

ராம்விலாஸ் பாஸ்வான், காங்கிரஸ் கூட்டணிக்குத் தாவுவார் என்கிற ஹேஷ்யத்துக்கு முடிவு கட்டப்பட்டிருப்பது லாலு பிரசாதின் ராஷ்ட்ரீய ஜனதா தளத்துக்கு ஆறுதலாக அமையும் என்றாலும், லாலு - பாஸ்வான் கூட்டணி, மும்முனைப் போட்டியில் எந்த அளவுக்கு பலமாக அமையும் என்பது கேள்விக்குறியாகவே இருக்கிறது என்கிறார்கள் அரசியல் நோக்கர்கள்.