அசாமில் தண்டவாளம் தகர்ப்பு: ரெயில் கவிழ்ந்து ஒருவர் பலி- தீவிரவாதிகள் நாசவேலை

அசாம் மாநிலம் கவுகாத்தியில் இருந்து கொல்கத்தா நோக்கி கரிப்ராத் எக்ஸ்பிரஸ் ரெயில் வந்து கொண்டு இருந்தது.

ரெயில் வந்து கொண்டு இருந்தபோது அசாமில் கோசைகான்- சவுதாரா ரெயில் நிலையங்களுக்கு இடையே தண்டவாளத்தில் சக்தி வாய்ந்த குண்டு வெடித்தது. இதில் கரிப்ராத் எக்ஸ்பிரஸ் ரெயில் சிக்கியது.

ரெயில் என்ஜினும் அதனுடன் இணைக்கப்பட்ட 5 பெட்டிகளும் தடம் புரண்டு கவிழ்ந்தன. அதிகாலை 2.25 மணிக்கு இந்த சம்பவம் ஏற்பட்டது. அப்போது ரெயில் பயணிகள் அயர்ந்து தூங்கிக் கொண்டு இருந்தனர். ரெயில் பெட்டி டமார் என்ற சத்தத்துடன் கவிழ்ந்ததும் பயணிகள் கூச்சல் போட்டு அலறினார்கள்.

இந்த விபத்தில் துர்லாவ் சேதியா என்பவர் பலியானார். என்ஜின் டிரைவர் உள்பட 7 பேர் படுகாயம் அடைந்தனர். தகவல் கிடைத்ததும் வட கிழக்கு ரெயில்வே பொது மேலாளர் மற்றும் மீட்பு குழுவினர் கவுகாத்தியில் இருந்து விரைந்து சென்று மீட்பு பணியில் ஈடுபட்டனர். காயம் அடைந்தவர்கள் அருகில் உள்ள ஆஸ்பத் திரிக்கு அனுப்பி வைக்கப்பட்டனர்

குண்டு வெடித்தபோது ரெயில் அந்த இடத்தில் மெதுவாக சென்று கொண்டு இருந்தது. இதனால் சேதம் அதிகம் இல்லை. பயணிகள் அனைவரும் வேறு ரெயில் மூலம் கொல்கத்தாவுக்கு அனுப்பி வைக்கப்பட்டனர்.

கவிழ்ந்த ரெயில் பெட்டிகளை மீட்கும் பணி நடை பெற்று வருகிறது. இதனால் அந்தப்பாதையில் ரெயில் போக்குவரத்து பாதிக்கப்பட்டு உள்ளது.

அசாமில் தடைசெய்யப்பட்ட என்.டி.எப்.பி. என்ற தீவிரவாத இயக்கம் இந்த நாசவேலையில் ஈடுபட்டுள்ளது தெரியவந்துள்ளது.

முன்னதாக நேற்று முன்தினம் இரவு அசாமில் சோனிட்பூர் மாவட்டத்தில் 2 இடங்களில் தண்டவாளத்தை குண்டு வைத்து தகர்த்தார்கள். தீவிரவாதிகள் தேஜ்பூர் மற்றும் உதல்கிரி மாவட்டங்களில் ரெயில் தண்டவாளங்களை தகர்க்கப்போவதாக மிரட்டல் விடுத்து இருந்தது குறிப்பிடத்தக்கது.