எங்கள் போராட்டம் பாராளுமன்றத்திலும் தொடரும்: மாநில கட்சிகளுடன் இணைந்து மத்திய அரசுக்கு நெருக்கடி கொடுப்போம்; சரத் யாதவ் அறிவிப்பு

பாரத் பந்த் போராட்டத்தை தொடர்ந்து பெட்ரோலிய பொருட்களின் விலை உயர்வை திரும்பப் பெறக்கோரி எங்கள் போராட்டம் பாராளுமன்றத்திலும் தொடரும். மாநில கட்சிகளுடன் இணைந்து மத்திய அரசுக்கு நெருக்கடி கொடுப்போம்'' என்று தேசிய ஜனநாயக கூட்டணியின் ஒருங்கிணைப்பாளரும், ஐக்கிய ஜனதா தளம் கட்சியின் தலைவருமான சரத் யாதவ் தெரிவித்தார்.

பெட்ரோல், டீசல், மண் எண்ணெய், சமையல் எரிவாயு ஆகியவற்றின் விலைகளை மத்திய அரசு உயர்த்தியதற்கு கண்டனம் தெரிவித்து, பா.ஜனதா தலைமையிலான தேசிய ஜனநாயக கூட்டணி கட்சிகள் மற்றும் இடதுசாரி கட்சிகள், அ.தி.மு.க, தெலுங்கு தேசம், அகாலி தளம் உள்ளிட்ட எதிர்க் கட்சிகள் நேற்று நாடு முழுவதும் முழு அடைப்பு போராட்டம் நடத்தின.

போராட்டம் முடிந்த பின்னர் மாலையில், டெல்லியில் உள்ள பா.ஜனதா தலைமை அலுவலகத்தில் அந்த கட்சிகளின் மூத்த தலைவர்கள் பேட்டி அளித்தனர்.

ஐக்கிய ஜனதா தளம் கட்சி தலைவரும், தேசிய ஜனநாயக கூட்டணியின் ஒருங்கிணைப்பாளருமான சரத் யாதவ் கூறியதாவது:-

கடந்த 1974-ம் ஆண்டு மறைந்த தலைவர் ஜெயப்பிரகாஷ் நாராயண் தலைமையில் நடைபெற்ற பாரத் பந்த் போராட்டத்துக்கு பின்னர் இன்று நடைபெற்ற போராட்டம்தான் பொது மக்களின் ஆதரவுடன் வெற்றிகரமாக நடந்துள்ளது. நாங்கள் தற்போது மக்களின் நீதி மன்றத்தை நாடி உள்ளோம்.

பெட்ரொலிய பொருட்கள் விலை உயர்வு பிரச்சினையை பாராளுமன்றத்தின் மழைக்கால கூட்டத்தொடரில் எடுத்துச் சென்று போராடுவோம். அ.தி.மு.க., தெலுங்கு தேசம், அகாலி தளம் போன்ற மாநில கட்சிகளுடன் பேச்சு வார்த்தை நடத்தி, மத்திய அரசுக்கு நெருக்கடி கொடுப்போம்.

இவ்வாறு சரத் யாதவ் தெரிவித்தார்.

பா.ஜனதா தலைவர் நிதின் கட்காரி கூறுகையில், ``அத்தியாவசிய பொருட்கள், பெட்ரோலிய பொருட்களின் விலை உயர்வுக்கு மத்திய அரசே காரணம். பண வீக்க விகிதம் 13 சதவீதத்தை எட்டியுள்ளது. ஐக்கிய முற்போக்கு கூட்டணி ஆட்சிக்கு வந்ததும் 100 நாட்களில் விலைவாசியை குறைப்போம் என்று அளித்த வாக்குறுதி என்ன ஆயிற்று? விலைவாசி உயர்வு, பெட்ரோலிய பொருட்களின் விலை ஏற்றம் குறித்து ஐக்கிய முற்போக்கு கூட்டணி தலைவர் சோனியா காந்தி, பிரதமர் மன்மோகன்சிங் மற்றும் ராகுல் காந்தி ஆகியோர் மவுனம் சாதிப்பது ஏன்?'' என்று கேட்டார்.
பந்த் குறித்து காங்கிரஸ் கட்சியின் செய்தி தொடர்பாளர் அபிஷேக் சிங்வி கூறுகையில், ``பா.ஜனதா மற்றும் இடதுசாரி கட்சிகளின் ஆட்சி நடக்கும் மாநிலங்களில் மட்டுமே பந்த் நடந்துள்ளது. மற்ற மாநிலங்களில் இந்த பந்த் முழு தோல்வி'' என்றார்.