இடதுசாரிகளுடன் கை கோர்க்க தயார்! நிதின் கட்காரி அறிவிப்பு

பெட்ரோலிய பொருட்களின் விலையை உயர்த்திய மத்தியில் ஆளும் காங்கிரஸ் கூட்டணி அரசை கண்டித்து பா.ஜ.க, மற்றும் கூட்டணி கட்சிகளும், இடதுசாரி கட்சியினரும் நடத்திய பந்த் காரணமாக டில்லியில் இயல்பு வாழ்க்கை பாதிக்கப்பட்டது.

இந்த முழுஅடைப்பினால் பொது மக்கள் பெரிதும் அவதிக்குள்ளாயினர். பந்த் ஆர்ப்பாட்டத்தில் ஈடுபட்ட பா.ஜ., தலைவர் கட்காரி, கட்சியின் தகவல் தொடர்பாளர் ஜாவேத்கர் ஆகியோர் கைது செய்யப்பட்டனர். தேசிய ஜனநாயக கூட்டணியில் அங்கம் வகிக்கும் பா.ஜ.க, சிவசேனா, ஐக்கிய ஜனதா தளம், அகாலிதளம் உள்ளிட்ட கட்சிகள் ஓரணியாகவும், இடதுசாரிகள், சமாஜ்வாடி, தெலுங்கு தேசம், அ.தி.மு.க., மதசார்பற்ற ஜனதா தளம், இந்திய தேசிய லோக்தளம் உள்ளிட்ட பல கட்சிகள் மற்றொரு அணியாகவும் முழு அடைப்பிற்கு அழைப்பு விடுத்திருந்தன.

தலைநகர் டில்லியில் போக்குவரத்து முற்றிலுமாக ஸ்தம்பித்தது. முக்கிய பகுதிகளான சாந்தினிசவுக்கில் பா.ஜ.,வும் மற்றும் ஐ.டி.ஓ.,வில் இடதுசாரிகளும் ஆர்ப்பாட்டம் நடத்தின. இதனால், போக்குவரத்து முழுவதுமாக நின்று போனது. மார்க்கெட்டுகளில் கடைகள் அனைத்தும் மூடப்பட்டிருந்தன. மேற்கு டில்லி பகுதியில் பா.ஜ.கவினர் பேருந்து மறியலில் ஈடுபட்டதால், மக்கள் அவதிக்குள்ளாயினர்.அதேபோல ஜனக்புரி மெட்ரோ நிலையத்தை பா.ஜ.கவினர் அடைத்தனர் இதன் பிறகு காவல்துறையினர் வந்து தலையிட்டதன் பேரில், மீண்டும் மெட்ரோ ரயில் இயங்கியது.

முக்கிய வர்த்தக இடமாக சாந்தினி சவுக் பகுதியில் நடந்த ஆர்ப்பாட்டத்தில் பேசிய பா.ஜ.கவின் தலைவர் நிதின் கட்காரி, மக்கள் பிரச்னைக்காக யாருடன் வேண்டுமானாலும் நாங்கள் கைகோர்க்க தயாராக உள்ளோம், தேவைப்பட்டால் இடதுசாரி கட்சிகளுடனும் பேசவும் நாங்கள் தயார் என்றார். ஏறத்தாழ 30 ஆண்டுகளுக்கு பிறகு பா.ஜ.,வும் இடதுசாரிகளும் ஒரே நாளில் ஒருங்கிணைந்து பந்த நடத்தியுள்ளன. கடந்த ஏப்ரலில் நடந்த வேலை நிறுத்தப் போராட்டத்தில் கூட, இடதுசாரிகள் மட்டுமே தனியாக பங்கேற்றன.

நடந்து முடிந்த முழு அடைப்பு குறித்து மார்க்சிஸ்ட் மூத்த தலைவர் நிலோத்பல் பாசு கூறும்போது, "காங்கிரஸ் அல்லாத மாநிலங்களில் முழு அடைப்பு முழு அளவில் வெற்றியும், மற்ற மாநிலங்களில் நல்ல வரவேற்பும் கிடைத்துள்ளது. முழு அடைப்பிற்கு முந்தைய தினம் ஒரு பைசா கூட விலையை குறைக்க மாட்டோம் என்று கூறிய பிரணாப் முகர்ஜிக்கு மக்கள் சரியான பதிலடியை தந்துள்ளனர்' என்று கட்காரி கூறினார்.