ஜப்பானில் நிலநடுக்கம்: பீதியில் மக்கள் ஓட்டம்

ரபீக் · ரபீக் Mon Jul 05, 2010 3:37 pm

வடக்கு ஜப்பானில் இன்று அதிகாலை நிலநடுக்கம் ஏற்பட்டது. இதனால் வீடுகள் மற்றும் கட்டிடங்கள் குலுங்கின. அப்போது ஆழ்ந்த தூக்கத்தில் இருந்த மக்கள் என்னவோ ஏதோ என நினைத்து கடும் அதிர்ச்சி அடைந்தனர். பின்னர் நிலநடுக்கம் என அறிந்ததும் பீதி அடைந்தனர்.

இதைத்தொடர்ந்து வீடுகளை விட்டு வெளி யேறி தெருக்களில் ஓட்டம் பிடித்தனர். சிறிது நேரத்துக்கு பிறகு பயத்துடன் வீடு திரும்பினர். இந்த நிலநடுக்கம் தலைநகர் டோக்கியோவில் இருந்து 500 கி.மீட்டர் தூரத்தில் 24 கி.மீட்டர் பூமிக்கு அடியில் ஏற்பட்டதாக அமெரிக்க புவியியல் ஆய்வு மையம் தெரிவித்துள்ளது.

நிலநடுக்கம் ரிக்டர் அளவில் 6.4 ஆக பதிவாகியுள்ளது. சுனாமி எச்சரிக்கை எதுவும் விடுக்கப்படவில்லை. சேத விவரங்கள் எதுவும் இதுவரை வெளியிடப்படவில்லை.

உலகில் பூகம்பம் ஏற்படும் பகுதிகளில் ஜப்பானும் ஒன்று. இங்கு அடிக்கடி நிலநடுக்கம் ஏற்படுவதும், சுனாமி எச்சரிக்கை விடுவதும் வாடிக்கையானது.

எனவே நிலநடுக்கத்தின் போது நடந்து கொள்ள வேண்டிய முன்எச்சரிக்கை குறித்து அங்கு மக்களுக்கு பயிற்சி அளிக்கப்பட்டு வருகிறது.