ஆயிரக்கணக்கான மேடைகளில் தாத்தா மைக் முன் உதறல் எடுத்த பேரன்!

நம்பினால் நம்புங்கள்... ஆயிரக்கணக்கான மேடைகளை பார்த்த கலைஞரின் பேரன் அருள்நிதிக்கு அந்த மேடையில் பேச்சே வரவில்லை. கை கால்கள் உதற, கண் கலங்க நின்றிருந்தார். வேறொன்றுமில்லை, இது நெகிழ்ச்சியால் வந்த அதிர்ச்சி!

இவர் நடிக்கும் 'வம்சம்' படத்தின் பிரஸ்மீட்டில்தான் இப்படி ஒரு காட்சி. இந்த இடத்தில் நான் நிக்கிறேன்னா அதுக்கு காரணம் என் தாத்தா, அப்பா, டைரக்டர் பாண்டிராஜ் என்று அடுக்கடுக்காக ஒவ்வொருவர் பெயரையும் உச்சரித்த அருள்நிதி 'இந்த தயக்கத்தை பார்த்துட்டு வேற மாதிரி நினைச்சிராதீங்க. நான் கலைஞர் குடும்பத்தை சேர்ந்தவன்தான்' என்றார். ஒரு கட்டத்தில் கண்கலங்கி இவர் அழ, டைரக்டர் பாண்டிராஜுக்கே அதிர்ச்சி. இவர்தான் இப்படி என்றால் பின்னாலேயே பேச வந்த படத்தின் கதாநாயகி சுனைனா மேலும் உணர்ச்சிவசப்பட்டு கண்கலங்கி வார்த்தைகளற்று நின்றார். நானும் இதுக்கு முன்னாடி பிரஸ்மீட்ல உங்களையெல்லாம் சந்திச்சிருக்கேன். அப்பல்லாம் இப்படி நேர்ந்தது இல்ல. இன்னைக்கு என்னவோ எமோஷனல் ஆகிட்டேன்.

புதுக்கோட்டையில அவ்வளவு கடுமையான வெயிலில் என்னை நடிக்க வச்சார் டைரக்டர். நான் மயங்கி விழுந்திருக்கேன். ஆனால் அத்தனை கஷ்டமும் இப்போ பறந்திருச்சு. அதனாலதான் இப்படி அழுதிட்டேன் என்று பிற்பாடு அதே மேடையில் விளக்கமும் அளித்தார் சுனைனா.

டைரக்டர் நிறைய கொடுமை பண்ணியிருக்கேன் போலிருக்கு. அதனால்தான் இரண்டு பேரும் அழறாங்க என்று நினைக்காதீங்க. எல்லா டைரக்டரும் என்ன பண்ணுவாங்களோ, அதைதான் நானும் பண்ணியிருக்கேன் என்ற வம்சம் படத்தின் டைரக்டர் பாண்டிராஜ், இந்த மேடையில் கொஞ்சம் அடக்கியே வாசித்தார். காரணம் முதல்நாள் நடந்த பாடல் வெளியீட்டு விழாவில் முதல்வர் கலைஞர் முன்னிலையில் இவர் நீண்ண்ண்ண்ட சொற்பொழிவு ஆற்ற, வெறுத்தே போன கலைஞர் 'டைரக்டர் ஒரு பேச்சாளராக இருப்பார் போலிருக்கிறது. ரொம்ப அதிகமா பேசிட்டாரு' என்று விமர்சித்திருந்தார். அதனால்தான் இப்படி ஒரு அடக்கம்.

பசங்க படத்தில் சோபிக்கண்ணு கேரக்டர் எப்படி எல்லாருக்கும் பிடிச்சிருந்ததோ, அதுமாதிரி இந்த படத்தில் சுனைனா கேரக்டரும் உங்களுக்கு ரொம்ப பிடிக்கும். வம்சம் படத்தில் அவரும் ஒரு ஹீரோ மாதிரிதான் என்றார் பாண்டிராஜ். அப்ப கூட சுனைனாவின் அழுத முகத்தில் மலர்ச்சியை பார்க்கணுமே?