நன்மைகளை அழிக்க கூடியது பொறாமை

நன்மைகளை அழிக்க கூடியது பொறாமை
உண்மை முஸ்லிமின் அடையாளம் அவர் மோசடி, பொறாமை, வஞ்சகம் போன்ற தீய குணங்களிலிருந்து பரிசுத்தமாக இருப்பதாகும். அந்த மனத் தூய்மையே அவரை சொர்க்கத்துக்குச் சொந்தமாக்கும்.

பொறாமை கொள்வது இறையச்சமுடைய முஸ்லிமுக்குச் சற்றும் பொருத்தமற்ற குணமாகும். நபி (ஸல்) அவர்கள் பொறாமை கொள்வதைக் கண்டித்து எச்சரித்துள்ளார்கள். நபி (ஸல்) அவர்கள் கூறினார்கள். ‘ஓர் அடியானின் இதயத்தில் ஈமானும் பொறாமையும் ஒன்று சேராது”.

(ஸஹீஹ் இப்னு ஹிப்பான்)

ஒரு முஸ்லிம் தனது மறுமையை நோக்கிய பயணத்தில் பொறாமைக்கு இடமளிக்காது தூய மனதுடன் வாழ்ந்தால் மிகக் குறைவான வணக்கமாக இருந்தாலும் அல்லாஹ் அவருக்கு நன்மைகளை வழங்குகிறான்.

அண்ணல் நபி (ஸல்) அவர்கள் கூறியதாக ழமூரா இப்னு ஸஃழபா (ரலி) அவர்கள் அறிவிக்கிறார்கள். ‘மனிதர்கள் தங்களுக்குள் பொறாமை கொள்ளாதகால மெல்லாம் நன்மைகள் மீதே நிலைத்திருப்பார்கள்”

(தபரானி)

பொறாமையானது நன்மைகளை அழித்து விடக்கூடிய பாவமாகும். நபி (ஸல்) அவர்கள் கூறியதாக அபூஹுரைரா (ரலி) அறிவிக்கிறார்கள். பொறாமையை விட்டும் தவிர்ந்துகொள்ளுங்கள். ஏனெனில் தீ விறகைத் தின்று விடுவதைப் போல், அல்லது வைக்கோலைத் தின்று விடுவதைப்போல், பொறாமை நன்மைகளைத் தின்று விடுகிறது.

(அபூதாவூத்)

பிற மனிதர்களை ஏமாற்றுவது, அவர்களுக்கு, இடையூறளிப்பது, பொறாமை கொள்வது, கோபம் போன்ற இழி குணங்களால், இதயம் இருண்டுபோன மனிதர், பெரிய வணக்கசாலியாக இருப்பினும், இஸ்லாமியத்தராசில் அவரது நன்மையின் தட்டுக் கனமற்றதாக மாறிவிடும். சமூகம் என்னும் மாளிகையில் அவர் உடைந்துபோன செங்கல்லைப் போன்றவராவார். எனவே நாமும் இத்தீய குணங்களிலிருந்தும் எம்மைப் பாதுகாத்துக்கொள்வோமாக!