நேபாளத்தில் கைது: நாகலாந்து மந்திரியிடம் சிக்கியது ஊழல் பணமா?

நேபாளத்தில் கைதான நாகலாந்து மந்திரியிடம் சிக்கியது ஊழல் பணமாக இருக்கலாம் என கருதப்படுகிறது. நாகலாந்து உளவுத்துறை மந்திரி இம்காங் இம்ஜன் நேபாளத்தில் ஒரு திருமண விழாவில் கலந்து கொள்ள சென்றிருந்தார். காத்மாண்டு விமான நிலையத்தில் அவர் இறங்கிய போது அவர் கொண்டு வந்த பொருட்களை சோதனையிட்டனர். அவரது பையில்கத்தை கத்தையாக ரூபாய் நோட்டுகள் இருந்தன. அனைத்து பணமும் ரூ.500, ரூ.1000 நோட்டுகளாக இருந்தன.

நேபாளத்தில் இந்தியாவின் 500 ரூபாய், 1000 ரூபாய் நோட்டுகளை கொண்டு செல்ல தடை உள்ளது. அதை மீறி அவர் இந்த நோட்டுகளை எடுத்து சென்றதால் கைது செய்யப்பட்டார்.

அவர் கைது செய்யப்பட்டது பற்றி முறைப்படி இந்திய உளவுதுறைக்கு நேபாள அரசு தகவல் அனுப்பி உள்ளது.

அவரிடம் மொத்தம் ரூ.9 லட்சம் பணம் இருந்துள்ளது. அதிக பணம் கொண்டு சென்றதற்காக அவர் கைது செய்யப்படவில்லை. 500 ரூபாய், 1000 ரூபாய் நோட்டுகளை கொண்டு சென்றதால் தான் கைது செய்யப்பட்டு உள்ளார்.

ஆனாலும் இவர் 9 லட்சம் பணத்தை வைத்து இருந்தது சர்ச்சைகளை ஏற்படுத்தி உள்ளது. இது ஊழல் செய்த பணமாக இருக்கலாம். ஊழல் பணத்தை நேபாளத்தில் பதுக்குவதற்காக கொண்டு செல்லப்பட்டு இருக்கலாம் என கருதப்படுகிறது.

மந்திரி கைது விவகாரத்தில் நேபாளத்தில் உள்ள இந்திய தூதரகம் உடனடியாக தலையிட்டது. 500 ரூபாய், 1000 ரூபாய் நோட்டுகளுக்கு தடை இருப்பது மந்திரிக்கு தெரியாது என்று விளக்கம் அளித்தனர். இதனால் அவர் விடுதலை செய்யப்பட்டார். ஆனாலும் ரூ. 9 லட்சம் வைத்து இருந்ததால் அவர் மீது பல்வேறு சந்தேகங்களை ஏற்படுத்தி உள்ளது.