மேட்டூரில் காதலன்வீட்டு முன்பு தூக்க மாத்திரை சாப்பிட்ட பெண்ணுக்கு 2-வது நாளாக சிகிச்சை: திருமணம் செய்வதாக கூறி அனுபவித்ததாக புகார்

சேலம் மாவட்டம் மேட்டூர் சதுரங்காடியை சேர்ந்தவர் நகராட்சி லாரி டிரைவர் தமிழ்வேலன். இவரது மகள் புவனேஸ்வரி (20) பி.ஏ. பட்டதாரியான இவர் மேட்டூர் பகுதியில் உள்ள ஒரு செல்போன் கடையில் வேலைப்பார்த்து வந்துள்ளார்.

மேட்டூர், பொன்நகரை சேர்ந்தவர் மணி. இவர் கிராம நிர்வாக அலுவலராக உள்ளார். இவரது மகன் பாலாஜி. எம்.பி.ஏ. படித்துள்ளார். இவரும் புவனேஸ்வரியும் காதலித்துள்ளனர்.

கடந்த 2 மாதங்களுக்கு முன்பு இவர்கள் பெற்றோருக்கு தெரியாமல் திருமணம் செய்து கொண்டதாக கூறப்படுகிறது. திருமணத்துக்கு பிறகு தனது பெற்றோர் வீட்டில் வசித்து வந்த புவனேஸ்வரி நேற்று காலை திடீரென தன் உடைமைகளுடன் பாலாஜி வீட்டுக்கு சென்றார். வீட்டில் பாலாஜியின் பெற்றோர் இல்லை. தனியாக இருந்த பாலாஜிக்கும், புவனேஸ்வரிக்கும் தகராறு ஏற்பட்டுள்ளது.

இறுதியில் புவனேஸ்வரியை வீட்டில் இருந்து வெளியேற்றி, மெயின்கேட்டை பூட்டி விட்டு பாலாஜி வெளியேறி விட்டார். அதிர்ச்சியடைந்த புவனேஸ்வரி பாலாஜி வீட்டுக்கு முன்பு தர்ணா செய்தார். பின்னர் தான் கொண்டு வந்திருந்த தூக்க மாத்திரைகளை திண்றார்.

இதைப்பார்த்த அவரது பெற்றோர் ஆஸ்பத்திரியில் கொண்டு போய் சேர்த்தனர். அங்கு அவருக்கு தீவிர சிகிச்சை அளிக்கப்பட்டது. இன்று 2-வது நாளாகவும் அவருக்கு சிகிச்சை அளிக்கப்பட்டு வருகிறது.

இதுகுறித்து புவனேஸ்வரியிடம் கேட்டபோது அவர் கூறியதாவது:-

இன்சூரன்ஸ் பாலிசி சம்பந்தமாக பேச ஒரு ஆண்டுக்கு முன்பு பாலாஜி எங்கள் வீட்டுக்கு வந்தார். அப்போதில் இருந்து நாங்கள் இருவரும் காதலிக்க ஆரம்பித்தோம். இரண்டு மாதங்களுக்கு முன்பு மேட்டூர் முனியப்பன் கோவிலில் பாலாஜி எனக்கு தாலி கட்டினார்.

திருமணத்தை பதிவு செய்ய கோவைக்கு அழைத்து சென்றார். ஆனால் திருமணத்தை பதிவு செய்யாமல் ஒரு ஓட்டலில் அறை எடுத்து அங்கு என்னை அவரது ஆசைக்கு இணங்க வைத்தார்.

கடந்த சித்திரை முதல் தேதி தமிழ்புத்தாண்டு அன்று அவரது பெற்றோர் என்னை பார்க்க விரும்புவதாகவும், உடனே வீட்டுக்கு வருமாறும் பாலாஜி அழைத்தார்.

நானும் பட்டுசேலை உடுத்தி மகிழ்ச்சியோடு அவரது வீட்டுக்குசென்றேன். அங்கு அவரது பெற்றோர் இல்லை. பாலாஜி மட்டுமே இருந்தார். அன்றும் என்னிடம் மோசமாக நடந்து கொண்டார்.

பலமுறை மன்றாடியும், பாலாஜியும், அவரது பெற்றோரும் என்னை அவர்கள் வீட்டில் சேர்க்க மறுத்துவிட்டனர். பாலாஜி என்னை ஏமாற்ற முயன்றதால் அவரது வீட்டுக்கு பெட்டி படுக்கையுடன் வந்து விட்டேன் என்று கண்ணீருடன் கூறினார்.

பாலாஜி கூறுகையில், புவனேஸ்வரியை திருமணம் செய்து கொண்டதற்கோ, உறவு கொண்டதற்கோ ஆதாரம் இல்லை. வேண்டுமானால் போலீசில் புகார் கொடுக்கட்டும். விசாரணையில் உண்மை தெரியும் என்றார்.