ஒரு கோல் போட்டு போர்ச்சுக்கல்லை வீழ்த்தியது ஸ்பெயின் வெற்றி; கால்இறுதியில் நுழைந்தது

உலக கோப்பை கால்பந்து போட்டியில் 2-வது சுற்றின் கடைசி ஆட்டம் இந்திய நேரப்படி நள்ளிரவு நடந்தது. இதில் உலக தரவரிசையில் 2-வது இடத்தில் இருக்கும் ஸ்பெயின் மூன்றாவது இடத்தில் இருக்கும் போர்ச் சுக்கல் அணிகள் மோதின.ஆட்டம் சமபலத்துடன் இருக்கும் என்று எதிர்பார்க்கப்பட்டது. ஆனால் ஸ்பெயின் அணியே அதிகமாக ஆதிக்கம் செலுத்தியது. முதல் பாதி ஆட்டத்தில் கோல் எதுவும் விழவில்லை.

டொரஸ், டேவிட் வில்லா அடித்த பந்துகளை போர்ச்சுக்கல் கோல் கீப்பர் எடுடர்டோ கடுமையாக தடுத்தார். இதேபோல போர்ச்சுக்கல் சேர்ந்த உலகின் முன்னணி வீரரான கிறிஸ்டியானோ ரொனால்டோ அடித்த பந்தை ஸ்பெயின் கோல் கீப்பரும், கேப்டனுமான கேசிலாஸ் அற்புதமாக தடுத்தார்.

2-வது பகுதி ஆட்டத்திலும் ஸ்பெயின் வீரர்கள் ஆதிக்கம் செலுத்தினார்கள். 63-வது நிமிடத்தில் அந்த அணி கோல் அடித்தது. ஷவி தட்டிக்கொடுத்த பந்தை டேவிட் வில்லா அடித்தார்.

இதை கோல் கீப்பர் எடுடர்டோ கடுமையாக போராடி தடுத்தார். அவரது கையில்பட்டு பந்து வெளியே வர டேவிட்வில்லா கோலாக்கினார். இந்த கோலால் ஸ்பெயின் வீரர்கள் மிகுந்த ஆரவாரம் அடைந்தனர். டேவிட் வில்லா இந்த உலக கோப்பையில் அடித்த 4-வது கோலாகும்.

ஸ்பெயின் அணி தொடர்ந்து கோல் அடிக்கும் வாய்ப்பை போர்ச்சுக்கல் கோல் கீப்பர் தடுத்தார். போர்ச்சுக்கல் அணிக்கு ஒரு சில வாய்ப்பை கிடைத்தது. ரொனால்டோ தவிர அந்த அணியில் யாரும் சரியாக விளையாடவில்லை. இறுதி வரை அந்த அணியால் பதில் கோல் அடிக்க இயல வில்லை.

ஆட்டத்தின் முடிவில் ஸ்பெயின் 1-0 என்ற கேகால் கணக்கில் வென்று கால் இறுதிக்கு தகுதி பெற்றது.

முரட்டு ஆட்டம் ஆடியதற்காக போர்ச்சுக்கல் வீரர் ரிக்கார்டோ கோஸ்டர் 89-வது நிமிடத்தில் சிவப்பு அட்டை காண்பிக்கப்பட்டு ஆடுகளத்தில் இருந்து வெளியேற்றப்பட்டார். ஸ்பெயின் அணியில் அலோன்சாவும், போர்ச்சுக்கல் அணியில் டியா கோவும் மஞ்சள் அட்டை பெற்றனர்.

ஐரோப்பிய சாம்பியனான ஸ்பெயின் அணி கால் இறுதியில் தென்அமெரிக்கா கண்டத்தை சேர்ந்த பராகுவேயுடன் மோதுகிறது. பராகுவே அணி 2-வது சுற்றில் ஜப்பானை பெனால்டி ஷீட்டில் 5-3 என்ற கோல் கணக்கில் வென்றது.

இன்றும், நாளையும் ஓய்வு நாளாகும். கால் இறுதி ஆட்டம் 2 மற்றும் 3-ந் தேதிகளில் நடக்கிறது.