8 பேரின் மரண தண்டனை ஆயுளாக குறைப்பு: பிரதிபா பாட்டீல்

மரண தண்டனை பெற்ற 8 பேரின் தண்டனையை, ஆயுள் தண்டனையாக குறைத்து குடியரசுத் தலைவர் பிரதிபா பாட்டீல் உத்தரவிட்டுள்ளார்.

1997-ம் ஆண்டு உத்தரப் பிரதேசத்தில் 10 வயது சிறுவன் உள்பட 5 பேரைக் கொலை செய்த வழக்கில் ஆயுள் தண்டனையை ஷியாம் மனோகர் உள்ளிட்ட 6 பேர் பெற்றனர். இவர்களது தண்டனையை உச்ச நீதிமன்றம் உறுதி செய்தது.

இதே உத்தரப் பிரதேசத்தில் ஒரே குடும்பத்தைச் சேர்ந்த 5 பேரைக் கொலை செய்த வழக்கில் தர்மேந்திர குமார், நரேந்திர யாதவ் ஆகியோருக்கு மரண தண்டனை விதிக்கப்பட்டது. இவர்களது தண்டனையும் உச்ச நீதிமன்றத்தால் உறுதி செய்யப்பட்டது.

இதைத் தொடர்ந்து ஷியாம் மனோகர் உள்ளிட்ட 6 பேர், தர்மேந்திர குமார், நரேந்திர யாதவ் ஆகியோர் குடியரசுத் தலைவருக்கு கருணை மனுவை கடந்த பிப்ரவரி 23-ம் தேதி அனுப்பினர்.மனுக்களை பரிசீலனை செய்த குடியரசுத் தலைவர், இவர்களது மரண தண்டனையை ஆயுள் தண்டனையாகக் குறைத்து உத்தரவிட்டுள்ளார். கடந்த 15-ம் தேதி குடியரசுத் தலைவர் அலுவலகம் இதற்கான உத்தரவைப்

பிறப்பித்துள்ளது.

தகவல் அறியும் உரிமைச் சட்டத்தின் கீழ் குடியரசுத் தலைவரின் அலுவலகத்தில் எஸ்.சி. அகர்வால் என்பவர் விண்ணப்பித்து இந்த தகவலைப் பெற்றுள்ளார்.இதேபோன்று மரண தண்டனை பெற்று தண்டனையைக் குறைக்கக் கோரும் 21 கருணை மனுக்கள் இன்னும் குடியரசுத் தலைவர் அலுவலகத்தில் நிலுவையில் உள்ளதாகத் தெரியவந்துள்ளது.

கடந்த 30 ஆண்டுகளில் இதுபோன்று, மரண தண்டனையைக் குறைக்குமாறு சுமார் 77 கருணை மனுக்கள் குடியரசுத் தலைவர் அலுவலகத்துக்கு வந்துள்ளன. இதில் 10 வழக்குகளில் மட்டும் மரண தண்டனை, ஆயுள் தண்டனையாகக் குறைக்கப்பட்டது.

கடைசியாக 2009-ம் ஆண்டு நவம்பர் 23-ம் தேதி தமிழகத்தைச் சேர்ந்த ஆர். கோவிந்தசாமி என்பவருக்கு விதிக்கப்பட்டிருந்த மரண தண்டனை, ஆயுளாகக் குறைக்கப்பட்டது.

அரசியலமைப்புச் சட்டத்தின் 72-வது பிரிவின் படி, கருணை மனுக்கள் மீது நடவடிக்கை எடுப்பதற்கு குடியரசுத் தலைவருக்கு காலக்கெடு எதுவும் கிடையாது. கருணை மனுவை குடியரசுத் தலைவர் நிராகரித்தால், குற்றம் செய்தவருக்கு மரண தண்டனை

நிறைவேற்றப்படும்.