போபால் விஷவாயுக் கசிவு சம்பவம்: பரிந்துரைகளை ஏற்றது மத்திய அமைச்சரவை

போபால் விஷவாயுக் கசிவு சம்பவத்தில் பாதிக்கப்பட்டோருக்கு ரூ.1,300 கோடி நிவாரணம் அளிப்பது உள்ளிட்ட அனைத்துப் பரிந்துரைகளையும் மத்திய அமைச்சரவை வியாழக்கிழமை ஏற்றுக் கொண்டது.
இது தொடர்பாக உயர் நீதிமன்றத்தில் மேல்முறையீடு செய்யவும், உச்ச நீதிமன்றத்தில் சீராய்வு மனு தாக்கல் செய்யவும் கூட்டத்தில் முடிவு செய்யப்பட்டது. உயிரிழந்தோர் குடும்பத்துக்கு தலா ரூ. 10 லட்சமும், நிரந்தரமாக ஊனமடைந்தவர்களுக்கு தலா ரூ. 5 லட்சமும், புற்றுநோய், நுரையீரல் பாதிப்புக்குள்ளானவர்களுக்கு தலா ரூ. 2 லட்சமும் வழங்க அமைச்சரவை ஒப்புதல் அளித்தது. போபால் விஷவாயு வழக்கு, நிவாரணம் உள்ளிட்ட பல்வேறு விஷயங்கள் குறித்து ஆய்வு செய்த மத்திய அமைச்சர்கள் குழு தனது அறிக்கையை பிரதமர் மன்மோகன் சிங்கிடம் திங்கள்கிழமை அளித்தது.

இக் குழு அளித்த பரிந்துரைகள் குறித்து தில்லியில் வியாழக்கிழமை நடைபெற்ற மத்திய அமைச்சரவை சிறப்புக் கூட்டத்தில் விரிவாக ஆலோசனை நடத்தப்பட்டது. இந்த கூட்டத்திற்குப் பின்னர் மத்திய செய்தி மற்றும் ஒலிபரப்புத் துறை அமைச்சர் அம்பிகா சோனி செய்தியாளர்களிடம் கூறியது: விஷவாயு கசிவு வழக்கில் போபால் நீதிமன்றம் அளித்த தீர்ப்பை எதிர்த்து உயர் நீதிமன்றத்தில் மேல்முறையீடு செய்ய முடிவு செய்யப்பட்டுள்ளது. இதே பிரச்னை தொடர்பாக உச்ச நீதிமன்றத்தில் சீராய்வு மனு தாக்கல் செய்யவும் தீர்மானிக்கப்பட்டுள்ளது.

சம்பவத்தில் பாதிக்கப்பட்டோருக்கு ரூ.1,300 கோடி நிவாரணம் அளிக்க வேண்டும் என்று மத்திய அமைச்சர்கள் குழு அளித்த பரிந்துரை முழுமையாகக் ஏற்றுக் கொள்ளப்பட்டது.
யூனியன் கார்பைடு வளாகத்தில் நச்சுக் கழிவுகளை அகற்ற ரூ.310 கோடியும், சம்பவத்தில் பாதிக்கப்பட்டோருக்கு மருத்துவ வசதி, மறுவாழ்வுப் பணிகளை மேற்கொள்ள ரூ.272 கோடியும் ஒதுக்க ஒப்புதல் அளிக்கப்பட்டது. யூனியன் கார்பைடு நிறுவனத்தை வாங்கிய "டௌ கெமிக்கல்ஸ்’ நிறுவனத்திடம், நச்சுக் கழிவுகளை அகற்றுவதற்காக பொறுப்பை ஏற்கச் செய்வது குறித்து ஆலோசிக்கப்பட்டு வருகிறது. இது தொடர்பாக அந் நிறுவனத்துக்கு எதிராக மத்திய பிரதேச நீதிமன்றத்தில் வழக்கு நிலுவையில் உள்ளது.

யூனியன் கார்பைடு நிறுவன முன்னாள் தலைவர் வாரன் ஆண்டர்சனை இந்தியா கொண்டு வருவது தொடர்பாக அமெரிக்க அரசிடம் மீண்டும் வலியுறுத்தப்படும். போபால் மருத்துவமனை நிர்வாகத்தை, மத்திய உயிரி தொழில்நுட்ப துறை வசம் ஒப்படைக்கவும், 90 நாள்களில் அங்கு இந்திய மருத்துவ ஆராய்ச்சிக் குழுவின் மையத்தை அமைக்கவும் முடிவு செய்யப்பட்டுள்ளது என்றார் அமைச்சர் அம்பிகா சோனி. 1984-ம் ஆண்டில் போபாலில் நேரிட்ட விஷவாயுக் கசிவு சம்பவத்தில் 15 ஆயிரம் பேர் பலியாகினர். 5 லட்சத்துக்கும் மேற்பட்டோர் உடல்நல பாதிப்புக்கு உள்ளாயினர்.