பிரபல நடிகைகள் மீது கருணாஸ் பகிரங்க தாக்கு!

நான் கறுப்பாக இருப்பதால் என்னுடன் ஜோடியாக நடிக்க பிரபல நடிகைகள் மறுத்தாக நடிகர் கருணாஸ் பகிரங்கமாக தாக்கி பேட்டியளித்தார். காமெடி நடிகராக தமிழ் சினிமாவில் வலம் வந்த கருணாஸ், திண்டுக்கல் சாரதி படம் நாயகனாக அறிமுகமானார். அவர் நாயகனாக நடித்துள்ள 2வது படம் அம்பாசமுத்திரத்து அம்பானி. இப்படம் குறித்த பத்திரிகையாளர் சந்திப்பின்போது நடிகர் கருணாஸ் கூறியதாவது:

நான் இப்போது அம்பாசமுத்திரம் அம்பானி தவிர மேலும் 3 படங்களில் நகைச்சுவை நாயகனாக நடிக்க இருக்கிறேன். இளைஞன் உள்பட 3 படங்களில் நகைச்சுவை வேடங்களில் நடிக்கிறேன். 10 பேர்களின் சட்டையை பிடித்து நியாயம் கேட்கிற வீரம் மிகுந்த வேடங்களிலோ அல்லது 50 பேர்களை ஒரே அடியில் வீழ்த்தும் கதாநாயகனாகவோ நான் நடிப்பது இல்லை. தன்னம்பிக்கையுடன் போராடினால் எந்தவொரு மனிதனும் வெற்றிபெற முடியும் என்ற கருத்துள்ள படங்களில் நடித்து வருகிறேன். இதுவரை நான் 80 படங்களில் நடித்துவிட்டேன். இன்னும் வாடகை வீட்டில்தான் வசிக்கிறேன். சம்பாதித்த பணத்தையெல்லாம் சினிமாவில்தான் முதலீடு செய்கிறேன். என்னை நம்பி 100 குடும்பங்கள் வாழ்கின்றன என்பதில் திருப்தி. நான் யாரையும் கெடுக்கவில்லை. யாரையும் தப்பாக கூட பார்த்ததில்லை.

ஆனால், என்னுடன் ஜோடி சேர்ந்து நடிக்க சில நடிகைகள் மறுக்கிறார்கள். யாரோ ஒருத்தர் சிவப்பாக கர்நாடகாவில் இருந்து வருகிறார். அவருக்கு ஜோடியாக நடிக்கிறார்கள். நான் கறுப்பு காமெடியனாக இருப்பதால் என்னுடன் சேர்ந்து நடிக்க மறுக்கிறார்கள். அதனால் இனிமேல் என் படங்களில் முதல்நிலை கதாநாயகிகள் தேவையில்லை. பக்கத்து வீட்டு பெண் மாதிரி நடிகை இருந்தால் போதும் என்ற முடிவுக்கு வந்துவிட்டேன்.

திண்டுக்கல் அருகே முதியோர்களுக்கு இல்லம் கட்டுவதற்காக 26 ஏக்கர் நிலம் வாங்கியிருக்கிறேன். இல்லம் அமைப்பதற்கான வேலைகள் தொடங்கிவிட்டன. நான் ஒரு ஆம்பளை தெரசாவாக இருந்து இறந்துவிட வேண்டும் என்று ஆசைப்படுகிறேன். அம்பாசமுத்திரம் அம்பானி'க்கு தணிக்கை குழுவினர், எல்லோரும் பார்க்கிற மாதிரியான `யு' சர்ட்டிபிக்கேட் வழங்கியிருக்கிறார்கள். தொடர்ந்து இதுபோன்ற விரசம் இல்லாத குடும்ப படங்களில் நடிப்பேன்.

இவ்வாறு நடிகர் கருணாஸ் கூறினார்.