நீதிமன்ற வளாகத்தில் போராட்டம் கூடாது: நீதிபதிகள் எச்சரிக்கை

நீதிமன்ற வளாகங்களில் வக்கீல்கள் போராட்டம் நடத்துவதை இனியும் பொறுத்து கொள்ள முடியாது என்று நீதிபதிகள் எச்சரித்தனர்.
தமிழை வழக்காடு மொழியாக்க வலியுறுத்தி, சென்னை உயர் நீதிமன்றத்தில் உண்ணாவிரதம் இருந்த 14 வக்கீல்களும், மதுரையில் உண்ணாவிரதம் இருந்த 6 வக்கீல்களும் கைது செய்யப்பட்டு சிறையில் அடைக்கப்பட்டனர். இவர்கள் ஜாமீன் கேட்டு, சென்னை உயர் நீதிமன்றத்தில் மனு தாக்கல் செய்தனர்.

இம்மனு தலைமை நீதிபதி இக்பால், நீதிபதி சிவஞானம் ஆகியோர் முன்பு நேற்று விசாரணைக்கு வந்தது. மனுதாரர்கள் சார்பில் வக்கீல் சங்கரசுப்பு ஆஜராகி, ‘உயர் நீதிமன்ற வளாகத்தில் எவ்வித போராட்டமும் நடத்த மாட்டோம் என உத்தரவாதம் அளிக்கிறோம். 20 பேரின் உடல்நிலை மோசமாக உள்ளது. அவர்களை ஜாமீனில் விட வேண்டும்’ என்றார்.

சிறையில் உள்ள பெண் வக்கீல் சக்திராணியின் மகன் குருபிரசாத்(10), தலைமை நீதிபதி முன் ஆஜராகி, ‘சிறையில் இருக்கும் என் அம்மாவை பார்க்க அனுமதி தர மறுக்கிறார்கள். அவரை பார்க்க அனுமதிக்க வேண்டும்’ என்றார். இதைக் கேட்ட தலைமை நீதிபதி, பிற்பகல் 2 மணிக்கு வழக்கை விசாரிப்பதாக தெரிவித்தார்.

இதன்பின்னர். பிற்பகலில் இந்த வழக்கு நீதிபதிகள் இப்ராகிம் கலிபுல்லா, பிரபா ஸ்ரீதேவன் ஆகியோர் முன்பு விசாரணைக்கு வந்தது. போலீஸ் தரப்பில் தமிழக அரசின் தலைமை குற்றவியல் வக்கீல் குமரேசன் ஆஜரானார். அவர் வாதாடும்போது, ‘நீதிமன்றம் பலமுறை உத்தரவிட்டும், இன்றும் நீதிமன்ற வளாகத்தில் போராட்டம் நடத்துகிறார்கள்’ என்றார்.

இதன்பின், நீதிபதிகள் கூறியதாவது:

நீதிமன்ற வளாகத்தில் எந்த போராட்டமும் நடத்தக் கூடாது. அரசியல்வாதிகள் உள்ளே வரக் கூடாது என்று உச்ச நீதிமன்றமும், உயர் நீதிமன்றமும் பல்வேறு தீர்ப்புகளை அளித்துள்ளன. இதை வக்கீல்கள் மதிப்பதில்லை. நீதிமன்ற உத்தரவுகளை காற்றில் பறக்க விட்டுள்ளனர். இதை வன்மையாக கண்டிக்கிறோம். சட்டத்தை நிலைநாட்ட வேண்டிய வக்கீல்களே, இப்படி சட்ட விரோத செயல்களில் ஈடுபடலாமா?
மதுரை உயர் நீதிமன்ற வளாகத்தை அரசியல் மேடையாக வக்கீல்கள் பயன்படுத்தியுள்ளனர். இது கண்டனத்துக்குரியது. உயர்நீதிமன்ற வளாகங்களில் வக்கீல்கள் இனி போராட்டம் நடத்தக் கூடாது.

வக்கீல்கள், நீதிமன்றத்தின் கண்ணியத்தை காக்க வேண்டும். வக்கீல்கள் நடந்து கொண்ட விதத்தை இனியும் பொறுத்துக் கொள்ள முடியாது. மனுதாரர்கள், ‘எவ்வித போராட்டமும் நடத்த மாட்டோம்’ என்று கூறுவதை பதிவு செய்து கொள்கிறோம். 20 வக்கீல்களும் சொந்த ஜாமீன் பத்திரத்தை சிறை கண்காணிப்பாளரிடம் கொடுத்து விடுதலை ஆகலாம்.

இவ்வாறு நீதிபதிகள் கூறினர்.

தகவலுக்கு நன்றி ரபீக்...