ஒரு கோடிக்கு சாடிலைட்! பூரிக்கிறார் காமெடி கருணாஸ்

ரபீக் · ரபீக் Thu Jun 24, 2010 1:31 pm

இதுவரைக்கும் வியாபாரத்தை பொறுத்தவரை கரு'லாஸ்' ஆக இருந்தவர் கருணாஸ்! ஜாம்பவான் படம் தொடங்கி, கற்றது தமிழ் வரை அவர் விநியோகம் செய்த அத்தனை படங்களும் அவரது பாக்கெட்டை பஞ்சர் ஆக்கியதுதான் மிச்சம். ஆனாலும் தளராத கருணாஸ், தானே சொந்தமாக தயாரித்த படம் அம்பாசமுத்திரத்தில் அம்பானி. இந்த படம் அவருக்கும் வட்டியும் முதலுமாக வாரிக் கொடுத்திருக்கிறது. சொன்னால் நம்ப மாட்டீர்கள். முன்னணி ஹீரோக்களின் படங்களுக்கு தருகிற விலையை கொடுத்து இந்த படத்தின் சேட்டிலைட் உரிமையை வாங்கியிருக்கிறது சன் டிவி. கிட்டதட்ட ஒரு கோடிக்கு மேல் கொடுத்திருக்கிறார்களாம்.

இது ஒருபுறம் இருக்க, விநியோகஸ்தர்களும் நல்ல விலைக்கு படத்தை வாங்கியிருக்கிறார்கள். பொதுவாக எம்.ஜி. மற்றும் அவுட் ரைட் முறையில் பெரிய நடிகர்களின் படங்களைதான் வாங்குவார்கள் விநியோகஸ்தர்கள். அதிலும் சாதித்திருக்கிறது அம்பானி. எல்லா ஏரியாவையும் இதே முறையில்தான் விற்றிருக்கிறார் கருணாஸ்.

அண்ணே, வெறுங்கையோடுதான் சென்னையில வந்து இறங்கினேன். இன்னைக்கு நாலு பேர உருவாக்கிவிடுற அளவுக்கு வளர்ந்திருக்கேன். இந்த படத்தின் டைரக்டர் ராம்நாத் என்னோட பத்து வருஷமா ஒண்ணு மண்ணா பழகியவர். ஒளிப்பதிவாளர் புலித்தேவனும் அப்படிதான். இவங்கள மாதிரி திறமைசாலிகளுக்கு கதவை திறந்து விடுற அளவுக்கு நல்லாயிருக்கேன்னா அது ஏதோ பூர்வ ஜென்மத்தில பண்ணிய புண்ணியம். இந்த ஜென்மத்திலும் அந்த புண்ணியத்தை தொடருவோம்னு நினைக்கிறேன். ஒரு ஆம்பிளை தெரசாவா இருக்கணும்னு நினைக்கிறேன். என் முதல் படமான திண்டுக்கல் சாரதி பெரிய ஹிட் ஆனவுடன் அதே திண்டுக்கல்லில் 28 ஏக்கர் நிலம் வாங்கி போட்டேன். இன்னும் கொஞ்சம் வாங்கி அந்த இடத்தில இந்தியாவிலேயே பெரிய முதியோர் இல்லம் ஆரம்பிக்கணும்னு ஆசைப்படுறேன். அதுக்கு எங்க அப்பா பெயரை வைக்கணும் என்று உணர்ச்சிபூர்வமாக பேசுகிறார் கருணாஸ்.

இந்த படம் ரிலீஸ் ஆவதற்கு முன்னாலேயே தொடர்ந்து நான்கு படங்களில் ஹீரோவாக நடிக்க ஒப்பந்தம் ஆகியிருக்கிறாராம். கொஞ்சம் வளர்ந்திட்டவுடன் ராக்கெட்டை கையில புடிச்சு பறக்கவிடுற ஆக்ஷன் ஹீரேவாக என்னை பில்டப் பண்ணிக்க மாட்டேன். எனது படங்கள் எல்லாமே பாக்யராஜ் பாணியிலதாண்ணே இருக்கும் என்றார். நல்ல முடிவு...!