விடுதலை புலிகளின் தமிழக உளவுப்பிரிவு தலைவர் கைது!

தமிழக பொட்டு அம்மன் என்று அழைக்கப்படும் தமிழீழ விடுதலைப்புலிகளின் தமிழக உளவுப்பிரிவுத் தலைவர் "சிரஞ்சீவி" சென்னையில் கீயூப் பிரிவு போலிஸாரால் கைது செய்யப்பட்டார்.விடுதலைப் புலிகளின் தமிழக தலைவராக செயல்பட்டவர் சிரஞ்சீவி(38) இவர் புலிகளின் உளவுப் பிரிவு தலைவர் பொட்டு அம்மனுடன் நெருங்கிய தொடர்புடையவர். இவர் தமிழகத்தில் இருந்து உளவுத் தகவல்களை விடுதலைப் புலிகளுக்கு அனுப்பி வந்தார்.





அமோனியம் நைட்ரேட்டை என்கிற வெடிமருந்தை கடந்த 2007ம் ஆண்டு இலங்கைக்கு அனுப்பிய வழக்கிலும், 2008ம் ஆண்டு சென்னையில் இருந்து உலோக உருளையை இலங்கைக்கு அனுப்பிய வழக்கிலும் போலிஸரால் தேடப்பட்டு வந்தார். போலிஸார் தேடுவது தெரிந்ததும் இலங்கைக்கு தப்பி சென்றார்.

இந்நிலையில் இலங்கையில் நடந்த கடைசி கட்ட யுத்தத்தில் பங்குபெற்றதால் இவருக்கு பலத்த காயம் ஏற்ப்பட்டது. ஆதலால் கடந்த மூன்று மாதங்களுக்கு முன் இலங்கையிலிருந்து சென்னைக்கு தப்பி வந்தார்.

இவர் உளவுப் பிரிவில் இருந்ததால் தமிழக போலிஸாருக்கும் இலங்கை இராணுவத்துக்கும் இவரைப் பற்றிய எந்த தகவல்களும் தெரியாமல் இருந்தது. சென்னையில் அவர் பதுங்கி இருப்பது தெரிந்ததும், கியூ பிரிவு ஐ.ஜி.சங்கர் ஜூவால் உத்தரவின்படி, எஸ்.பி அசோக்குமார் தலைமையிலான பொலிஸார் சிரஞ்சீவியை கைது செய்தனர்.

இவர் தமிழக அரசியல் தலைவர்களை விடுதலை புலிகளுக்கு அறிமுகப்படுத்தியவர். இலங்கைக்கும் தமிழகத்திற்க்கும் அடிக்கடி சென்று வருபவர். தமிழக தமிழையும் இலங்கை தமிழையும் மிக தெளிவாக பேசக்கூடியவர் என கூறப்படுகிறது.