தாவூத் தம்பியை கொல்ல சோட்டா ராஜன் முயற்சி

சர்வதேச பயங்கரவாதி தாவூத் இப்ராகிம் தம்பி இக்பால் கஸ்கரை தீர்த்து கட்ட சோட்டா ராஜன் கும்பல் தீட்டிய திட்டத்தை மும்பை போலீசார் முறியடித்தனர்.
மும்பையை பொறுத்தவரை நிழல் உலக தாதாக்களான தாவூத் இப்ராகிமும், சோட்டா ராஜனும் பரம எதிரிகளாக உள்ளனர். கடந்த 2003ம் ஆண்டு சவூதியில் கைது செய்யப்பட்ட தாவூத் இராகிமின் தம்பி இக்பால் கஸ்கர், கொலை மற்றும் சாரா&சஹாரா காம்ளக்ஸ் கட்டிய வழக்குகள் தொடர்பாக மும்பைக்கு நாடு கடத்தப்பட்டார். கஸ்கர் மீது மகாராஷ்டிரா திட்டமிட்ட குற்றத்தடுப்பு சட்டத்தின் கீழ் வழக்குகள் பதிவு செய்யப்பட்டன. ஆனால், இந்த வழக்குகளில் போதிய ஆதாரம் இல்லாத காரணத்தால் கஸ்கரை நீதிமன்றம் விடுதலை செய்தது.

இந்த நிலையில், கஸ்கரை தீர்த்து கட்ட சோட்டா ராஜன் கும்பல் திட்டம் தீட்டியது. வெள்ளிக்கிழமை தோறும் பென்டி பஜார், பக்மோதியா தெருவில் உள்ள தனது வீட்டில் இருந்து பாதுகாவலர்களுடன் காரில் கிளம்பி பாம்பே மருத்துவமனை அருகில் உள்ள பாபா பஹாவ்தீன் மசூதிக்கு வந்து தொழுகை நடத்துவது கஸ்கருக்கு வழக்கம். ராஜன் கும்பலை சேர்ந்தவர்கள் ஒரு மாத காலமாக கஸ்கர் நடமாட்டத்தை நோட்டமிட்டு வந்தனர். தொழுகைக்கு வரும் கஸ்கரை மசூதி அருகே தீர்த்து கட்ட முடிவு செய்தனர்.

கஸ்கரை தீர்த்து கட்டும் திட்டம் பற்றி போலீசுக்கு தெரியவந்தது. ராஜன் கூட்டாளிகள் போட்ட திட்டம் நிறைவேறினால் மும்பையில் மீண்டும் கோஷ்டி மோதல் வெடிக்கு என கருதிய போலீசார் கஸ்கரை காப்பாற்ற முடிவு செய்தனர்.

ஒரு வெள்ளிக்கிழமை அன்று கஸ்கர் வரும் நேரத்தில் மசூதி அருகே கூட்ட நெரிசலில் 4 பேர் சந்தேகப்படும்படியாக நடமாடுவதை போலீசார் கண்டு பிடித்தனர். அவர்களும் போலீசார் தங்களை நோட்டமிடுவதை அறிந்து கூட்டத்தோடு கூட்டமாக கலந்து தப்பினர். அன்று கஸ்கர் வழக்கம் போல் தனது தொழுகையை முடித்துக் கொண்டு வீடு திருப்பி சென்றார். வீட்டுக்கு சென்ற பிறகுதான் தன்னை கொல்ல ராஜன் கூட்டாளிகள் போட்டிருந்த திட்டம் குறித்து கஸ்கருக்கு தெரிந்தது.

“அந்த சம்பவத்துக்கு பிறகு கஸ்கர் வெளியில் செல்வதை தவிர்த்துவிட்டார். மிக நெருங்கியவர்களின் வீட்டு விஷேசத்துக்கு கூட கஸ்கர் செல்வதில்லை. சாப்பாட்டை கூட நன்றாக சோதித்த பிறகுதான் கஸ்கர் சாப்பிடுகிறார்” என போலீசார் தெரிவித்தனர்.