கிராமப்புற பெண்களுக்கு 1 ரூபாய்க்கு “நாப்கின்” மத்திய அரசு புதிய திட்டம்

இந்தியாவில் கிராமப்புறங்களில் வசிக்கும் பெண்கள் மாதவிலக்கு நாட்களில் கடும் அவதிக்குள்ளாவதாக ஒரு ஆய்வில் தெரிய வந்தது. நகர்ப்புற பெண்கள் “நாப்கின்” பயன்படுத்துவது போல, அவர்களால் இயலவில்லை என்றும் அதற்கு நாப்கின் விலையும் ஒரு காரணம் என்று அந்த ஆய்வில் சுட்டிக் காட்டப்பட்டிருந்தது.

இதையடுத்து கிராமப்புற பெண்களின் நலவாழ்வுக்காக கடந்த 2005-ம் ஆண்டு தேசிய கிராம சுகாதார திட்டம் கொண்டு வரப்பட்டது. இந்த திட்டத்தின் கீழ் தற்போது புதிதாக குறைந்த விலைக்கு நாப்கின் கொடுக்கும் திட்டத்தை மத்திய அரசு கொண்டு வந்துள்ளது.

இந்த திட்டத்தின்படி கிராமப்புறங்களில் வறுமைக்கோட்டுக்கு கீழ் வாழும் இளம்பெண்களுக்கு ஒரு ரூபாய்க்கு “நாப்கின்” வழங்க முடிவு செய்யப்பட்டுள்ளது. அரசு வழங்கும் இந்த பொட்டலம் ஒவ்வொன்றிலும் தலா 6 நாப்கின்கள் இருக்கும். இந்த நாப்கின்கள் உயர்தரத்துடன் தயாரித்துக் கொடுக்கப்படும்.

கிராமப்புறங்களில் வாழும் பெண்களில் ஓரளவு வசதி இருப்பவர்களுக்கு இந்த நாப்கின்கள் 5 ரூபாய்க்கு கொடுக்கப்படும். இதன் மூலம் கிராமங்களில் வசிக்கும் பெண்கள் அனைவரும் சுகாதாரமான நாப்கின்களை பெற வழி கிடைக்கும். இது கிராமப் பெண்களின் உடல் நலத்தையும், சுகாதாரத்தையும் மேம்படுத்தும் என்று எதிர்பார்க்கப்படுகிறது.

இந்த புதிய திட்டத்தை செயல்படுத்த மத்திய அரசு ரூ. 150 கோடி ஒதுக்கீடு செய்துள்ளது. இந்தியா முழுவதும் 235 மாவட்டங்களில் இந்த திட்டத்தை அமல்படுத்த திட்டமிடப்பட்டுள்ளது.

முதல் கட்டமாக 150 மாவட்டங்களில் ஏழைப்பெண்களுக்கு ஒரு ரூபாய்க்கு நாப்கின் வழங்கப்பட உள்ளது. தமிழ்நாடு, கேரளா, ஆந்திரா, கர்நாடகா, மராட்டியம், குஜராத்தில் 30 மாவட்ட பெண்கள் பயன் பெறுவார்கள்.

வடக்கு மற்றும் வடகிழக்கு மாநிலங்களில் உள்ள 100 மாவட்டங்களில் இந்த திட்டம் பெரிய அளவில் நடைமுறைக்கு வர உள்ளது. இந்த திட்டம் காரணமாக முதல் கட்டமாக கிராமங்களில் வசிக்கும் சுமார் 1 1/2 கோடி இளம்பெண்கள் பயன்பெறுவார்கள் என்று தெரிய வந்துள்ளது.