இந்தோனேசியா அருகே இன்று பயங்கர நிலநடுக்கம்; மக்கள் அலறியடித்து ஓட்டம்

ரபீக் · ரபீக் Wed Jun 16, 2010 11:50 am

சில ஆண்டுகளாக இந்தோனேசியாவில் அடிக்கடி நில நடுக்கம் ஏற்படுகிறது. இந்த நிலையில் இன்று மேற்கு இந்தோனேசிய பகுதியில் சக்தி வாய்ந்த நில நடுக்கம் ஏற்பட்டது. இதனால் கடற்கரை நகரமான பியாக்கில் வீடுகள், கட்டிடங்கள் பயங்கரமாக குலுங்கின. வீடுகளில் இருந்த பொருட்கள் அங்குமிங்கும் உருண்டோடின. இதனால் மக்கள் பீதி அடைந்தனர்.

நூற்றுக்கணக்கான மக்கள் தங்கள் வீடுகளை விட்டு ஓட்டம் பிடித்தனர். காலை வேளையில் கடற்ரைக்கு உலா வந்த மக்கள் அங்கிருந்து ஓடினர்.

நிலநடுக்கத்தால் ஏற்பட்ட சேத விவரம் குறித்த தகவல் எதுவும் வெளியாக வில்லை. ஆனால் நில நடுக்கம் 7.1 ரிக்டர் அளவில் பதிவாகி இருந்ததாக வானிலை மற்றும் புவியியல் மையங்கள் தெரிவித்துள்ளன.

பயங்கர நில நடுக்கம் என்பதால் சுனாமி எச்சரிக்கை விடப்பட்டது. ஆனால் அது போன்று ஏற்படவில்லை. பாபுவா மாகாணத்தில் கடலுக்கு அடியில் 33 கி.மீட்டர் ஆழத்தில் நில நடுக்கம் ஏற்பட்டதாக தெரிவிக்கப்பட்டுள்ளது.