அமைச்சர் பதவியில் இருந்து மம்தா பானர்ஜி விலகுகிறார்: மத்திய மந்திரி சபை அடுத்த மாதம் மாற்றம்

ரபீக் · ரபீக் Wed Jun 16, 2010 11:48 am

மேற்கு வங்க மாநிலத்தில் அடுத்த ஆண்டு தொடக்கத்தில் சட்டசபை தேர்தல் நடைபெற உள்ளது. அங்கு ஆட்சியை தக்க வைத்துக் கொள்ளும் முயற்சிகளில் ஆளும் மார்க்சிஸ்ட் கம்யூனிஸ்டு கட்சி தீவிர நடவடிக்கைகளில் ஈடுபட்டுள்ளது.

மார்க்சிஸ்ட் கம்யூனிஸ்டு கட்சிக்கு சவால் விடும் வகையில் மம்தா பானர்ஜியின் திரிணாமுல் காங்கிரஸ் கட்சி செல்வாக்கு பெற்றுள்ளது. சமீபத்தில் அங்கு நடந்த உள்ளாட்சித் தேர்தலில் பெரும்பாலான இடங்களில் திரிணாமுல் காங்கிரஸ் கட்சி வெற்றி பெற்று சாதனை படைத்தது. கொல்கத்தா மாநகராட்சியையும் மம்தா பானர்ஜி ஆதரவாளர்கள் கைப்பற்றினார்கள்.

இதைத் தொடர்ந்து சட்ட சபைக்கு மம்தாபானர்ஜி “குறி” வைத்துள்ளார். காங்கிரசுடன் கூட்டணி சேர்ந்து ஆட்சியை கைப்பற்றி விடலாம் என்று அவர் நினைக்கிறார். இதற்கான நடவடிக்கைகளை மம்தா பானர்ஜி இப்போதே தொடங்கி விட்டார்.

சட்டசபை தேர்தலுக்கான வேட்பாளர்களை தேர்வு செய்யும் பணியை அவர் ஏற்கனவே தொடங்கி விட்டார். அடுத்து மேற்கு வங்க மாநிலம் முழுக்க சுற்றுப்பயணம் செய்து ஆதரவு திரட்ட திட்டமிட்டுள்ளார். அந்த சமயத்தில் ரெயில்வே இலாகா பணிகளில் கவனம் செலுத்த முடியாது என்பதால் மத்திய மந்திரி சபையில் இருந்து விலக மம்தா பானர்ஜி தீர்மானித்துள்ளார்.

அவரது விலகல் முடிவை பிரதமர் மன்மோகன்சிங் ஏற்றுக் கொண்டதாகத் தெரிகிறது. எனவே விரைவில் மம்தாவின் விலகல் அறிவிப்பு வெளிவரும் என்று எதிர்பார்க்கப்படுகிறது.

மம்தா பானர்ஜி விலகும் பட்சத்தில், ரெயில்வே இலாகா காலியாகும். மத்திய மந்திரி சபையில் ஏற்கனவே சில இலாகாக்கள் காலியாக உள்ளன. அவை கூடுதல் பொறுப்புக்களாக மற்ற மந்திரிகளிடம் உள்ளன.

இதனால் மத்திய மந்திரிகளுக்கு பணிச்சுமை ஏற்பட்டுள்ளது. இதை நிவர்த்தி செய்ய மத்திய மந்திரி சபையை மாற்றி அமைக்க பிரதமர் மன்மோகன்சிங் முடிவு செய்துள்ளார். அடுத்த மாதம் (ஜூலை) மந்திரிசபை மாற்றம் இருக்கும் என்று தெரிகிறது.

காங்கிரஸ் மூத்த மந்திரிகளில் சிலர் தங்களுக்கு வேறு இலாகாவை கொடுக்கும்படி ஏற்கனவே பிரதமரிடம் வேண்டுகோள் வைத்துள்ளனர். எனவே அதிருப்தியில் உள்ள காங்கிரஸ் மந்திரிகளின் இலாகாக்கள் மாற உள்ளது. மம்தா பானர்ஜியின் ரெயில்வே இலாகாவை பெறவும் காங்கிரஸ் தலைவர்களிடம் கடும் போட்டி ஏற்பட்டுள்ளது.

ஆனால் ரெயில்வே இலாகாவை தன் கட்சிக் காரரிடம் கொடுக்க மம்தா விரும்புவதாக தெரிகிறது. இதற்கிடையே 2012-ம் ஆண்டு உத்தரபிரதேசத்தில் தேர்தல் நடைபெற உள்ளதால் அங்குள்ள சிறுபான்மை மக்களை கவர, அந்த மாநிலத்தைச் சேர்ந்தவர்கள் மந்திரிகள் ஆக்கப்படலாம் என்று கூறப்படுகிறது.

மூத்த காங்கிரஸ் தலைவரும், மேல்-சபை எம்.பி.யுமான மோஷினா கித்வாய் சிறுபான்மைப் பிரிவு மந்திரி ஆக்கப்படலாம் என்று தெரிகிறது.

கூட்டணிக் கட்சியில் உள்ள சிலரது இலாகாவை மாற்றி அமைக்கவும் பிரதமர் மன்மோகன்சிங் திட்டமிட்டு உள்ளதாக தெரிகிறது.

அமைச்சர் பதவியில் இருந்து மம்தா பானர்ஜி விலகுகிறார்: மத்திய மந்திரி சபை அடுத்த மாதம் மாற்றம்

அமைச்சர் பதவியில் இருந்து மம்தா பானர்ஜி விலகுகிறார்: மத்திய மந்திரி சபை அடுத்த மாதம் மாற்றம்

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக