கருமாரி அம்மன் கோயில் C/O டேவிட்!

‘‘கடவுள் ஒருவரே. அவரவர் மதத்துக்கு ஏற்ப முருகன், இயேசு, அல்லா என வழிபடுகிறோம். மதத்திலோ கடவுளிலோ ஏற்றத்தாழ்வே கிடையாது’’ என்கிறார் டேவிட்.

பிறவி கிறிஸ்தவரான இவர் 30 ஆண்டுகாலமாக சென்னை நுங்கம்பாக்கத்தில் உள்ள கருமாரி அம்மன் கோயிலை நிர்வகித்து வருகிறார். இது மதச்சார்பற்ற இந்தியாவுக்கான ஆரோக்யமான செய்தி! ‘‘1978&ல் பெய்த பேய்மழை யில் சென்னை நகரமே வெள்ளக்காடானது. நாங்கள் வசித்த நரசிம்மபுரம் ஏரியாவும் பயங்கர பாதிப்புக்கு உள்ளானது.

எங்கள் குடியிருப்புவாசிகள் எல்லாரும் நுங்கம்பாக்கத்தில் உள்ள கல்லூரியில் தஞ்சமடைந்தோம். அப்போது கல்லூரியைச் சுற்றிலும் பொட்டல்காடுதான். வெள்ளம் வடிஞ்சதும் கல்லூரிக்குப் பக்கத்தில் குடிசை போட்டு வசிக்க ஆரம்பித்தோம்.

இங்கு உருவான புதிய குடியிருப்புவாசிகளின் தேவைகளைப் பூர்த்தி செய்ய என்னைத் தலைவரா நியமிச்சாங்க. கோயில் இல்லாத ஊரில் குடியிருக்க முடியாதே... சின்னதாக குடிசை போட்டு, திருவேற்காட்டில் கருமாரியம்மன் சிலை ஒன்றை வாங்கி வந்து பிரதிஷ்டை செய்தோம். அப்படித்தான் இங்கு கருமாரி அம்மன் கோயில் உருவானது.

அன்று முதல் இன்று வரை இந்தக் கோயிலை நான் நிர்வகித்து வருகிறேன்’’ என்கிற டேவிட், குடிசையில் இருந்த அம்மனுக்கு கோயில் கட்டிய கதையையும் சொன் னார். ‘‘அடிப்படையில் நான் கொத்தனார். பல கட்டிடங்கள், மண்டபங்களைக் கட்டி இருக்கிறேன். அந்த அனுபவத்தால் இந்த கோயிலை நானே முழுசா கட்டி முடித்தேன்.

உண்டியல் காசு மற்றும் மக்களே விரும்பிக் கொடுத்த நன்கொடை மூலம் இந்தக் கோயிலை கட்டி கும்பாபிஷேகமும் நடத்தினேன். உண்டியல் காசு அம்மனின் சொத்து... அதை அவளின் தேவைக்கு மட்டுமே பயன்படுத்தி வருகிறோம்’’ என்கிற டேவிட் இந்த கோயிலை முழு ஈடுபாட்டோடு நிர்வாகம் செய்வது பாராட்டத்தக்க விஷயம்தானே!

சூப்பர் அருமையான தகவல்கள்

டேவிட் நீவீர் வாழ்க

இந்த மாதிரி கோவில்களுக்கு நன்கொடை முழுமனதுடன் வழங்கலாம்

சிவா சார் இந்த கோயில் முகவரி இருந்தால் கொடுங்களேன்