மெரீனா கடற்கரையில் “மொபைல்” வேன் மூலம் இயற்கை உணவு விற்பனை

ரபீக் · ரபீக் Tue Jun 15, 2010 11:40 am

டி.யு.சி.எஸ். கூட்டுறவு நிறுவனம் சென்னையில் பல இடங்களில் சூப்பர் மார்க்கெட்டுகளை நிறுவி பொதுமக்களுக்கு குறைந்த விலையில் மளிகை பொருட்களை விற்பனை செய்து வருகிறது.

விரைவில் மருந்து கடைகளையும் 5 இடங்களில் திறக்க உள்ளது. தரமான பொருட்களை குறைந்த விலையில் விற்பதால் பொதுமக்கள் மத்தியில் டி.யு.சி.எஸ். நிறுவனத்திற்கு வரவேற்பு உள்ளது.

இந்த நிலையில் மெரீனா கடற்கரையில் “வாக்கிங்” செல்லும் பொதுமக்களுக்காகவும், சுற்றுலா பயணிகளுக்காகவும் இயற்கை உணவு பொருட்களை விற்பனை செய்யும் புதிய முயற்சியில் ஈடுபட்டுள்ளது.

கம்பு, கேழ்வரகு, சோளம் உள்ளிட்ட தானிய உணவுகள், ரசாயன கலவை இல்லாமல் உற்பத்தி செய்யப்பட்ட பொருட்களை விற்பனை செய்கிறது.

மெரீனா கடற்கரை காந்தி சிலைக்கு பின்புறம் “மொபைல்” வேன் மூலம் இயற்கை உணவுகளை விற்பனை செய்கிறது. காலை 6 மணி முதல் இரவு 7 மணி வரை இந்த இடத்தில் விற்பனை நடைபெறும் என்று டி.யு.சி.எஸ். தனி அலுவலர் சக்தி சரவணன் தெரிவித்தார்.

மேலும் அவர் கூறுகையில், புதிதாக தொடங்கப்படும் மருந்து கடைகளிலும் இயற்கை உணவை விற்க திட்டமிட்டுள்ளோம். மருந்து கடைகள் திறப்பதற்கான அனுமதி பெறப்பட்டு பணிகள் நடந்து வருகின்றன. விரைவில் அவை தொடங்கப்படும். மற்ற கடைகளை விட குறைந்த விலையில் தரமான மருந்துகள் மட்டும் விற்பனை செய்யப்படும். போலி மற்றும் காலாவதியான மருந்துகள் பற்றி கவலைப்படாமல் பொதுமக்கள் நம்பிக்கையுடன் வாங்கி செல்லலாம்.

இவ்வாறு அவர் கூறினார்.