5 நாள் தவத்தில் நித்தியானந்தா: போலீஸாருக்கு அனுமதி மறுப்பு

பிடதி ஆசிரமத்தில் சாமியார் நித்யானந்தா பஞ்சாக்னி தவம் செய்ய துவங்கியுள்ளார். ஆசிரமத்துக்குள் பாதுகாப்புக்கு வந்த போலீசாரை நிர்வாகிகள் அனுமதிக்கவில்லை.
பல்வேறு மோசடி குற்றச்சாட்டுகளுக்காக கைது செய்யப்பட்டு 52 நாட்கள் சிறையில் அடைக்கப்பட்டு இருந்த சாமியார் நித்யானந்தாவுக்கு, கர்நாடக உயர் நீதிமன்றம் கடந்த வெள்ளிக்கிழமை நிபந்தனை ஜாமீன் அளித்தது. இதையடுத்து, அவர் நேற்று முன்தினம் மாலை சிறையிலிருந்து விடுதலை செய்யப்பட்டு பிடதி ஆசிரமம் சென்றார். நேற்று காலை சூரிய உதயமானதும் நித்யானந்தா, ‘பஞ்சாக்னி’ என்னும் தவத்தில் அமர்ந்தார். 3 அடி தூரத்துக்கு வட்ட வடிவில் நெருப்பை வளர்த்து அதன் நடுவே அமர்ந்து தவம் மேற்கொண்டார். அவருடன் 20 பக்தர்களும் தவம் செய்தனர்.

இது குறித்து ஆசிரம பக்தர் ஒருவர் கூறுகையில், “ஆசிரமத்துக்கு வந்த நித்யானந்தா காலையிலேயே வழக்கமான பூஜைகளை தொடர்ந்தார். ஆசிரம வளாகத்தில் உள்ள 101 லிங்கங்களுக்கும் பூஜை நடந்தது. பின்னர், பஞ்சாக்கினி தவத்தை தொடங்கினார். ஆசிரமத்தை சூழ்ந்துள்ள துஷ்ட சக்திகளை விரட்டவும், உலக நன்மைக்காகவும் இந்த பூஜை நடத்தப்பட்டது. நித்யானந்தாவை பார்க்க வெளியில் இருந்து ஏராளமான பக்தர்கள் வந்தனர். ஆனால், யாருடனும் அவர் பேசவில்லை. பஞ்சாக்னி தவம் தொடர்ந்து 5 நாட்கள் நடைபெற உள்ளது. பின்னர், எல்லாரையும் அவர் சந்திப்பார்” என்றார்.

ஐந்து நாட்கள் தவத்துக்குப் பிறகு பத்திரிகையாளர்களை சந்திக்க நித்யானந்தா திட்டமிட்டு இருப்பதாக கூறப்படுகிறது.

பிரமோத் முத்தாலிக் சந்திப்பு:

ஸ்ரீராமசேனை தலைவர் பிரமோத் முத்தாலிக் நேற்று காலை பிடதி ஆசிரமத்துக்கு வந்து நித்யானந்தாவை சந்தித்தார். “நித்யானந்தாவிடம் உதவியாளராக இருந்த லெனின் கருப்பன் வேறு மதத்தைச் சேர்ந்தவர் என்பதால், நித்யானந்தாவுக்கு எதிராக அவர் சதிச் செயலில் ஈடுபட்டார்” என்று பத்திரிகையாளர்களிடம் முத்தாலிக் கூறினார்.

போலீசுக்கு அனுமதி மறுப்பு:

பொதுமக்கள் தாக்கக்கூடும் என்ற அச்சத்தால் பிடதி ஆசிரமத்தைச் சுற்றி பலத்த போலீஸ் பாதுகாப்பு அளிக்கப்பட்டுள்ளது. இருப்பினும், ஆசிரமத்துக்குள் போலீசாரை அனுமதிக்க நிர்வாகிகள் மறுத்தனர்.