மாணவர்களை குறிவைத்த போதைமருந்து கும்பல் கைது

மாணவர்களுக்கு போதைப்பொருள் விநியோகித்த மருந்துக்கடை உரிமையாளர் மற்றும் போதைப்பொருள் கும்பலை காவல்துறையினர் கைது செய்துள்ளனர்.
அமைந்தகரை மசூதி அருகில் மஹாவீர் மெடிக்கல் உள்ளது. இதன் உரிமையாளர் சிக்கந்தர் சந்த் (37). இவர், மும்பையில் இருந்து போதை பொருட்களை கடத்தி வந்து, மருந்து கடையில் வைத்து சில்லரை வியாபாரிகளுக்கு விற்பதாக மத்திய வருவாய் புலனாய்வு துறையினருக்கு ரகசிய தகவல் கிடைத்தது. கூடுதல் தலைமை இயக்குனர் ராஜன் தலைமையில் அதிகாரிகள் கடைக்கு விரைந்தனர்.

அதிகாரிகள் வருவதை அறிந்த சிக்கந்தர் சந்த், அகமதாபாத் தப்பி செல்ல திட்டமிட்டார். சென்னையில் இருந்து நேற்று காலை 11.30க்கு அகமதாபாத் செல்லும் ஸ்பைஜெட் விமானத்தில் செல்ல சென்னை விமான நிலையம் வந்தார். அதை அறிந்த அதிகாரிகள், சிக்கந்தர் சந்த்தை சுற்றிவளைத்து கைது செய்தனர். அவரை தி.நகரில் உள்ள தலைமை அலுவலகத்துக்கு கொண்டு சென்று விசாரித்தனர்.

அவர் கொடுத்த தகவலின்படி, மற்றொரு தனிப்படையினர் வளசரவாக்கத்துக்கு விரைந்தனர். வளசரவாக்கம் நகராட்சி அலுவலகம் அருகில் நின்ற ஒரு வெள்ளை நிற (டிஎன் 33 ஜெ 6575) காரை சுற்றி வளைத்தனர். அதிகாரிகளை பார்த்ததும் காரில் இருந்த 4 பேர் தப்பி ஓடமுயன்றனர். அதிகாரிகள் அவர்களை மடக்கினர்.

அவர்கள் காரைக்குடியை சேர்ந்த சரவேஷ் அகமது (33). வேல்முருகன் (35), சேப்பாக்கத்தை சேர்ந்த சம்சுதீன் (44), தண்டையார்பேட்டையை சேர்ந்த அஸ்லம் பாஷா (36) என்பது தெரிய வந்தது. காரில் 30 கிலோ போதை பொருட்களை கைப்பற்றினர். அதன் சர்வதேச மதிப்பு ரூ.6 கோடி. அத்துடன் ரூ.5 லட்சத்து 83 ஆயிரத்து 250 மற்றும் காரை அதிகாரிகள் பறிமுதல் செய்தனர்.

விசாரணையில், மும்பையில் இருந்து போதை பொருட்களை கடத்தி, இளைஞர்கள், மாணவர்களுக்கு விற்று சம்பாதித்துள்ளனர். அத்துடன் போதை பொருட்கள் மலேசியா, பிலிப்பைன்ஸ், சீனா ஆகிய நாடுகளுக்கு விமான பயணிகள் மூலம் கடத்தி சென்று பல கோடிக்கு விற்றுள்ளனர்.
ஐந்து பேர் மீதும் வழக்குப் பதிவு செய்து கைது செய்து விசாரித்து வருகின்றனர்.