காதல் தகராறில் ஆத்திரம்: கம்பத்தில் கட்டி வைத்து ஆட்டோ டிரைவர் கொலை

நெல்லை மாவட்டம் ஆலங்குளம் அருகே உள்ள வடக்கு பூலாங்குளத்தைச் சேர்ந்தவர் மாடக்கண் (வயது 35). ஆட்டோடிரைவர். அதே ஊரைச் சேர்ந்த சுப்பையா என்பவரது 2 வது மகள் உமா மகேஸ்வரியை காதலித்து வந்தார். அவரை திருமணம் செய்யவும் முறைப்படி பெண் கேட்டார்.

ஆனால் இருவரும் வெவ்வேறு சமூகத்தை சேர்ந்தவர்கள் என்பதால் உமாமகேஸ்வரியின் தந்தை திருமணத்துக்கு எதிர்ப்பு தெரிவித்தார்.

இதையடுத்து தனது மகளுக்கு உடனடியாக வேறு மாப்பிள்ளை பார்த்தார். புளியரை அருகே உள்ள கட்டளை குடியிருப்பைச் சேர்ந்த முத்து என்பவருக்கு உமாமகேஸ்வரியை திருமணம் செய்து கொடுத்தார்.

திருமணம் முடிந்து 5 ஆண்டுகளாகியும் காதலியை மறக்க முடியாத மாடக்கண் வேறு திருமணம் செய்ய வில்லை.

இந்த நிலையில் உமா மகேஸ்வரியும் ,மாடக்கண்ணுவும் அடிக்கடி செல்போனில் பேசி தங்களது காதலை தொடர்ந்தனர். இருவரும் தனிமையில் சந்தித்ததாகவும் கூறப்படுகிறது.

இது உமாமகேஸ்வரியின் கணவர் முத்துக்கு தெரிந்து மனைவியை எச்சரித்தார். ஆனாலும் அவர்களது காதல் தொடர்ந்தது.

நேற்று முன்தினம் பூலாங்குளத்தில் உச்சினிமாகாளி அம்மன் கோவில் கொடை விழா நடந்தது. இதில் கலந்து கொள்ள முத்து மனைவி உமாமகேஸ்வரி மற்றும் 2 மகள்களுடன் பூலாங்குளம் சென்றார். அப்போது உமாமகேஸ்வரி மாடக்கண்னிடம் பேசியதாக கூறப்படுகிறது.

இதனால் முத்து ஆத்திர மடைந்தார். மாமனார் சுப்பையாவிடம் பேசி மாடக்கண்னை தீர்த்துக்கட்ட முடிவு செய்தார். சுப்பையா இன்று அதிகாலை 3 மணி அளவில் மாடக்கண் வீட்டுக்கு சென்றார். பேரக்குழந்தைக்கு உடல்நலம் சரியில்லை, ஆஸ்பத்திரி செல்லவேண்டும். ஆட்டோ கொண்டு வா என்றார். மாடக்கண் உடனே தனது ஆட்டோவுடன் சுப்பையா வீட்டுக்கு சென்றார்.

அங்கு மருமகன் முத்து மற்றும் உறவினர்கள் திரண்டு நின்றனர். அவர்கள் மாடக்கண்ணை பிடித்து டெலிபோன் கம்பத்தில் கட்டி வைத்தனர். திருமணமான பெண்ணிடம் கள்ளதொடர்பு வைக்கலாமா? என்று கூறி சரமாரியாக அடித்து உதைத்தனர். கட்டை மற்றும் கல்லாலும் தாக்கினர். 1 மணி நேரம் நடந்த தாக்குதலில் மாடக்கண் சம்பவ இடத்திலேயே இறந்தார். பின்னர் அவர்கள் தப்பி ஓடி விட்டனர்.

இன்று காலை அந்த வழியாக சென்றவர்கள் மாடக்கண் பிணமாக கம்பத்தில் தொங்கிக் கொண்டிருப்பதை பார்த்து அதிர்ச்சி அடைந்தனர்.

இன்று காலை சுப்பையாவை போலீசார் கைது செய்தனர். அவரது மருமகன் முத்து உள்பட மேலும் சில உறவினர்களை தேடி வருகிறார்கள்.