புலிகள் அதிரடி தாக்கு: 23 பேர் சிதறி சாவு

கொழும்பு: இலங்கையில் ஐக்கிய தேசிய கட்சியின் அலுவலக திறப்பு விழாவில் விடுதலைப் புலிகள் மனித வெடி குண்டு தாக்குதல் நடத்தினர். இதில், முன்னாள் ராணுவ தளபதி, அவரது மனைவி உள்ளிட்ட 23 பேர் உடல் சிதறி பலியாயினர். 80க்கும் மேற்பட் டோர் காயமடைந்தனர்.இலங்கையில் புலிகளின் கட்டுப் பாட்டில் உள்ள கிளிநொச்சி, முல்லைத் தீவு உள்ளிட்ட பகுதிகளில் ராணுவம் தீவிர தாக்குதல் நடத்தி வருகிறது. புலிகளின் முக்கிய நிலைகளை ராணுவம் கைப்பற்றியுள்ளது. இதற்கு பதிலடி தரும் வகையில் புலிகள் நேற்று தாக்குதல் நடத்தினர்.


திறப்பு விழாவில் தாக்குதல்: சுற்றுலா நகரமான, அனுராதாபுரத்தில் இலங்கையின் முக்கிய எதிர்க்கட்சியான ஐக்கிய தேசிய கட்சியின் புதிய அலுவலக திறப்பு விழா நேற்று காலை நடந்தது. அனுராதாபுரம் பஸ் நிலையம் அருகே நடந்த இந்த விழாவில், ஐக்கிய தேசிய கட்சியின் வட மத்திய மாகாண தலைவரும், முன்னாள் ராணுவ தளபதியுமான ஜனக பெரைரா, அவரது மனைவி, ஐக்கிய தேசிய கட்சியின் அனுராதாபுரம் பகுதி மேலாளர் ஜான் புள்ளே மற்றும் அவரது மனைவி ஆகியோர் கலந்து கொண்டனர்.ஏராளமான கட்சி தொண்டர்களும் இதில் பங்கேற்றனர்.திறப்பு விழா நடந்து கொண்டிருக்கும்போது, அங்கு வந்த மர்ம மனிதன் தனது உடலில் மறைத்து வைத்திருந்த சக்தி வாய்ந்த குண்டை வெடிக்கச் செய்தான். பலத்த சத்தத்துடன் அந்த பகுதி முழுவதும் புகை மண்டலம் எழுந்தது. அங்கு கூடியிருந்தவர்கள் சிதறி ஓடினர். ஜனக பெரைரா, அவரது மனைவி மற்றும் கட்சி தொண்டர்கள் உள்ளிட்ட 23 பேர் உடல் சிதறி பலியாயினர். 80க்கும் மேற்பட்டோர் காயமடைந்தனர்.


போர் தந்திரங்களை வகுத்தவர்: அந்த பகுதி முழுவதும் ரத்த சிதறல்களும், சிதறிய உடல்களுமாக கிடந்தன. ராணுவ செய்தி தொடர்பாளர் உதய நானயக்காரா கூறுகையில்,"கிளிநொச்சியில் புலிகள் தங்கள் பிடியை இழந்து வருகின்றனர். இந்நிலையில், ராணுவத்தின் கவனத்தை திசை திருப்பும் வகையில் புலிகள் தான், இந்த தற்கொலை படை தாக்குதலை நடத்தியுள்ளனர்'என்றார். தற்கொலை படை தாக்குதலில் பலியான மாஜி தளபதி பெரைரா, புலிகளுக்கு எதிராக பல முக்கிய தாக்குதல்கள் நடத்தியவர். 2001ல் புலிகளை யாழ்ப்பாணத்திற்குள் முன்னேற விடாமல் தடுப்பதற்காக பல போர் தந்திரங்களை வகுத்தவர்.


ராணுவத்தில் இருந்து ஓய்வு பெற்ற பின், ஆஸ்திரேலியா, இந்தோனேசியா ஆகிய நாடுகளுக்கான இலங்கை தூதராகவும் பணியாற்றினார்.புலிகளின் தளம் தகர்ப்பு: இதற்கிடையே, கிளிநொச்சி பகுதியில் ராணுவம் நேற்றும் தொடர்ந்து தீவிர தாக்குதல் நடத்தியது. நச்சிக்குடா என்ற இடத்தில் புலிகளின் பீரங்கி ஏவுதளங்கள் மீது போர் விமானங்கள் சரமாரியாக குண்டுகளை வீசி தாக்கின. இதில், புலிகளின் இரண்டு பீரங்கி ஏவுதளங்கள் தகர்க்கப்பட்டது.


கிளிநொச்சியை சுற்றி தரை வழியாகவும், விமானம் மூலமாகவும் ராணுவம் நேற்று தாக்குதலை தீவிரப்படுத்தியது. இதில், 25 புலிகள் கொல்லப்பட்டதாகவும், ராணுவ வீரர்கள் மூன்று பேர் உயிரிழந்ததாகவும், ராணுவம் அறிவித்துள்ளது.