ஆண் குழந்தை ரூ.1 லட்சம்: பெண் குழந்தை ரூ.20 ஆயிரம்

**சிவா** · **சிவா** Fri Jun 04, 2010 4:05 pm

ஆண் குழந்தை ரூ.1 லட்சம்: பெண் குழந்தை ரூ.20 ஆயிரத்துக்கும் விற்ற கும்பல்: திடுக்கிடும் தகவல்

குழந்தை கடத்தலில் ஈடுபட்ட முக்கிய புள்ளியான சென்னை கிரிஜா உள்ளிட்ட 7 பேரிடம் இருந்து இதுவரை 8 குழந்தைகளை போலீசார் மீட்டுள்ளனர். ஆண் குழந்தைகளை ரூ. 1 லட்சத்துக்கம், பெண் குழந்தைகளை ரூ. 20 ஆயிரத்துக்கும் விற்பனை செய்திருப்பது தெரியவந்துள்ளது.

ஓசூரில் இருந்து கிருஷ்ணகிரிக்கு சிகிச்சை பெறுவதற்காக தூக்கி வந்த தனது 3 மாத குழந்தையை, ஒரு கும்பல் கடத்தி விட்டதாக ராமாத்தாள் என்ற பெண் கிருஷ்ணகிரி காவல் நிலையத்தில் புகார் அளித்தார். புகாரின் அடிப்படையில் விசாரணை நடத்தியதில், கிருஷ்ணகிரியைச் சேர்ந்த தனலெட்சுமி, சென்னையை சேர்ந்த ஆட்டோ டிரைவர் சிவா, அவரது மனைவி கிரிஜா, இவரது கூட்டாளி ராணி ஆகியோர் கைது செய்யப்பட்டனர். இவர்கள் கொடுத்த தகவலின் அடிப்படையில், மத போதகர்கள் சென்னை படப்பையைச் சேர்ந்த அல்போன்ஸ் சேவியர்(48), திண்டிவனத்தைச் சேர்ந்த செல்வம் (44), ஆகியோரும் கைது செய்யப்பட்டனர்.

இவர்களிடம் இருந்து ராமாத்தாளில் 3 மாத கைக்குழந்தையும் மற்றும் 3 வயது ஆண் குழந்தை ஒன்றும் விற்கப்பட்டது. போலீசாரால் கைது செய்யப்பட்ட அனைவரும் சிறையில் அடைக்கப்பட்டனர். இவர்களில் கிரிஜாவை காவலில் எடுத்த போலீசார் சென்னை மற்றும் பாண்டிச்சேரிக்கு அழைத்துச் சென்று விசாரணை நடத்தினர்.

அப்போது கிரிஜா கொடுத்த தகவலில் லலிதா என்ற பெண்ணையும் போலீசார் கைது செய்தனர். இந்த லலிதா அகில இந்திய மனித உரிமைகள் அமைப்பின் மகளிர் அணி தலைவியாக செயல்பட்டதும் தெரியவந்தது. இவர்கள் தெரிவித்த தகவலின் பேரில் பாண்டிச்சேரி, கடலூர், சென்னை ஆகிய ஊர்களில் இருந்து மேலும் பல குழந்தைகள் விற்கப்பட்டுள்ளன.

இதுவரை நடத்திய விசாரணையில் 8 குழந்தைகள் விற்கப்பட்டுள்ளது தெரியவந்துள்ளது. இந்த குழந்தைகள் அனைத்தும் கிருஷ்ணகிரி, காவேரிபட்டினத்தில் கடத்தப்பட்டு, பல்வேறு இடங்களில் விற்பனை செய்துள்ளனர்.

சென்னை பெரம்பூரில் 2 குழந்தைகளும், பாண்டிச்சேரியில் 3 குழந்தைகளும், பண்ருட்டியில் 2 குழந்தைகளும், செஞ்சியில் ஒரு குழந்தையும் விற்கப்பட்டுள்ளது. இதில் 5 ஆண் குழந்தைகளும், 3 பெண் குழந்தைகளும் அடங்கும்.

ஆண் குழந்தைகளை ரூ. 1 லட்சத்துக்கம், பெண் குழந்தைகளை ரூ. 20 ஆயிரத்தில் இருந்து 80 ஆயிரம் ரூபாய் வரை விற்பனை செய்திருப்பது தெரியவந்துள்ளது. குழந்தை கடத்தலில் ஈடுபட்ட முக்கிய புள்ளியனா சென்னை கிரிஜா உள்ளிட்ட 7 பேர் இதுவரை கைது செய்யப்பட்டுள்ளனர்.

கிரிஜா காவல் இன்றுடன் முடிவடைகிறது. இதனால் அவர் கிருஷ்ணகிரி நீதிமன்றதில் ஆஜர்படுத்தப்பட்டு சிறையில் அடைக்கப்படுகிறார். குழந்தை கடத்தலில் மேலும் பெரிய கும்பல் இருப்பதாக போலீசார் சந்தேகம் அடைந்து உள்ளனர். இதனால் கிருஷ்ணகிரி தனலெட்சுமியை காவலில் எடுத்து விசாரிக்க போலீசார் முடிவு செய்துள்ளனர்.