காய்கறிகள் சமைக்கும் முறை

**சிவா** · **சிவா** Wed Oct 15, 2008 12:11 am

1. கீரைகளை இரவில் சமைப்பதை தவிர்க்க வேண்டும். கீரை செரிப்பதற்கு 12 மணி நேரம் தேவை. தூங்கும் போது செரிமானம் சரிவர நடப்பதில்லை. வயிற்றுக் கோளாறு ஏற்பட வாய்ப்புண்டு.

2. வீட்டில் பறித்த முருங்கை கீரை, சுத்தமாகத் தான் இருக்கும் என்று, சிலர் நீரில் அலசுவதில்லை. இது தவறு. கீரையில் தூசி இருக்கும்; கண்டிப்பாக அலச வேண்டும்.

3. கேரட், பரங்கி, உருளை போன்ற காய்கறிகளின் தோலை நீக்காமல் சமைக்க வேண்டும். அவ்வாறு சமைப்பதால் கூடுதல் சத்து கிடைக்கிறது.

4. காய்கறிகளைப் பெரிய துண்டுகளாக நறுக்குவது நல்லது. சிறு சிறு துண்டுகளாக நறுக்குவதால் சத்துகள் அதிகளவில் வீணாகின்றன.

5. காய்கறிகளை நீரில் வேகவிட்டு, அந்த நீரை கொட்டிவிடாமல், குழம்பு, ரசம் இவற்றில் சேர்த்துக் கொள்ளலாம்.

6. காய்கறிகளை கழுவிய பிறகு தான் நறுக்க வேண்டும். நறுக்கிய பின் கழுவுதல் தவறு.

7. பசுமையான காய்கறி, கீரைகளையே சமைக்க வேண்டும். இல்லாவிடில் வைட்டமின் "சி' சத்து அழிந்து விடும்.

8. காய்கறி வேக வைக்கும் போது சிலர் சோடா உப்பை சேர்ப்பர். இது தவிர்க்க வேண்டிய ஒன்று.

சவ்சவ் தோல், பரங்கியின் மிருது பாகம், பீர்க்கங்காயின் தோல் இவற்றை வீணாக்காமல் சத்தான சுவை மிகுந்த துவையல் தயாரிக்கலாம்.

தோல், சதை பகுதிகளை எண்ணெயில் வதக்கி வறுத்த உளுத்தம்பருப்பு, மிளகாய், காயம், புளி, உப்புடன் சேர்த்து அரைத்து உபயோகிக்கலாம்.

**சிவா** · **சிவா** Wed Oct 15, 2008 12:12 am

கீரைகள்:

கீரை பூத்துக் காணப் பட்டால் வாங்கக் கூடாது. முளைக்கீரை, அரைக்கீரை போன்றவற்றின் தண்டுகள் பெருத்திருந்தால் சுவையாக இருக்காது.

வாழைத் தண்டு:

இதை நகத்தால் கிள்ளிப் பார்க்க வேண்டும். நார் தெரிந்தால் வாங்கக் கூடாது. நூல் தெரிந்தால் வாங்கலாம்.
நூல்கோல், முள்ளங்கி, சுரைக்காய், சவ்சவ், பீர்க்கங்காய்: இவற்றை நகத்தினால் அழுத்திப் பார்த்து வாங்க வேண்டும். நகம் இறங்கினால் வாங்கலாம். நகம் இறங்காவிட்டால் அவை முற்றல்.

முட்டைகோஸ்:

இலை பிரியாமலும், சற்று பச்சை நிறமாகவும் இருக்கிறதா என்று பார்த்து வாங்க வேண்டும்.

தக்காளி:

முற்றிலும் பழுத்த தக்காளியை விட, அரை அல்லது முக்கால் வாசி பழுத்த தக்காளி சுவையாக இருக்கும்.
அவரைக்காய், பீன்ஸ், காராமணி: இவற்றின் விதைகள் புடைத்து கொண்டு இருந்தால், வாங்கக் கூடாது. அவை முற்றலாக இருக்கும்.

கருணைக் கிழங்கு:

சிவந்த நிறத்துடன் காணப்படும் கருணைக் கிழங்கு மிகுந்த சுவையுடையதாக இருக்கும். சீக்கிரம் வெந்துவிடும்.