உள்ளாட்சித் தேர்தலில் மம்தா மாபெரும் வெற்றி-உடனே பணிந்த காங்கிரஸ்

மேற்கு வங்கத்தில் நடைபெற்ற உள்ளாட்சித் தேர்தலில் மம்தா பானர்ஜியின் திரிணமூல் காங்கிரஸ் மாபெரும் வெற்றி பெற்றுள்ளது.

கொல்கத்தா மாநகராட்சியையும், 36 நகராட்சிகளையும் கைப்பற்றி இடதுசாரிகளையும் காங்கிரஸ் கட்சியையும் படுதோல்வி அடையச் செய்துள்ளது.

இதையடுத்து மம்தாவிடம் உடனடியாகப் பணிந்துள்ளது காங்கிரஸ் தலைமை. மேற்கு வங்கத்தில் நடந்த ரயில் கவிழ்ப்பு சம்பவம் தொடர்பாக மம்தாவின் கோரி்க்கையை ஏற்று சிபிஐ விசாரணை நடத்த முடியாது என்று கூறி வந்த மத்திய அரசு, திடீரென அந்த வழக்கு சிபிஐயிடம் ஒப்படைக்க முன் வந்துள்ளது.

வரும் சட்டமன்றத் தேர்தலில் மம்தாவுடன் கூட்டணி சேர்ந்தால் மட்டுமே இந்த மாநிலத்தில் காங்கிரசின் மானம் தப்பும் என்பதால், அவருக்கு பணிய ஆரம்பித்துள்ளது அந்தக் கட்சி.

மத்தியில் காங்கிரஸ் கூட்டணியில் இருந்தாலும், மாநிலத்தில் அந்தக் கட்சியுடன் மம்தா பானர்ஜி கூட்டு சேரவில்லை. உள்ளாட்சித் தேர்தலில் இரு கட்சிகளும் கூட்டணி அமைக்க முயன்றன.

ஆனால், இரு கட்சிகளும் சமமான இடங்களைப் பகிர்ந்து கொள்ளலாம் என்று காங்கிரஸ் கூறியதை மம்தா ஏற்கவில்லை. உங்கள் கூட்டணியே தேவையில்லை என்று கூறி வெட்டிவிட்டுவிட்டு தனித்துப் போட்டியிட்டு மாபெரும் வெற்றி பெற்றுள்ளார்.

இரண்டாவது இடத்தை ஆளும் இடதுசாரிகள் பிடித்துள்ளனர். ஆனால், இந்தத் தேர்தலில் காங்கிரஸ் தான் படு கேவலமான தோல்வியைடைந்துள்ளது.

இதையடுத்து வரும் சட்டமன்றத் தேர்தலில் எப்படியாவது மம்தாவுடன் கூட்டணி சேருவதற்காக, அவரது கோரிக்கையை ஏற்று ரயில் கவிழ்ப்பு சம்பவ வழக்கை சிபிஐ வசம் ஒப்படைத்துள்ளது காங்கிரஸ்,
இதற்கு மேற்கு வங்க அரசு கடும் எதிர்ப்பு தெரிவித்துள்ளது.

மம்தா மகிழ்ச்சி:

இதை ரயில்வே அமைச்சரான மம்தா பானர்ஜி மகிழ்ச்சியுடன் வரவேற்றுள்ளார்.

அவர் கூறுகையில், சிபிஐ விசாரணை விஷயத்தில் மத்திய அரசின் முடிவு மகிழ்ச்சியளிக்கிறது.

மேற்கு வங்கத்தில் இடதுசாரிக் கட்சிகளின் 34 ஆண்டு ஆதிக்கத்தை ஒழிக்க பாடுபட்டோம். 34 ஆண்டுகளுக்குப் பின் மேற்கு வங்கத்தில் உள்ளாட்சித் தேர்தலில் எங்களுக்கு மாபெரும் வெற்றி கிடைத்துள்ளது.

இதனால் இங்கு உடனடியாக சட்டசபைத் தேர்தலை நடத்த வேண்டும்.

உள்ளாட்சித் தேர்தலில் தோல்வியுற்ற மார்க்சிஸ்ட் கம்யூனிஸ்ட் கட்சி பதவியில் நீடிப்பதற்கு தார்மிக உரிமை இல்லை என்றார்.