இரண்டு வயது குழந்தை கொன்று புதைப்பு : சிறுவனிடம் விசாரணைக்கு எதிர்ப்பு

arularjuna · arularjuna Wed Jun 02, 2010 12:02 pm

விருதுநகர் : விருதுநகர் அருகே குமாரலிங்கபுரத்தில் இரண்டு வயது குழந்தை கொன்று புதைக்கப்பட்டது. பணம் கொடுத்தால் குழந்தையை பெற்றுக்கொள்ளலாம் என கடிதம் எழுதி மிரட்டிய சிறுவன் சிக்கினான். அவனை போலீசார் விசாரிக்க அழைத்து செல்வதற்கு எதிர்ப்பு தெரிவித்து, கிராம மக்கள் மறியலில் ஈடுபட்டனர்.

வி.குமாரலிங்கபுரத்தைச் சேர்ந்தவர் கணேசன்(35); இவரது மனைவி அழகம்மாள். இவர்கள் ஆடு மேய்க்கும் தொழில் செய்து வருகின்றனர். இவர்களுக்கு இரண்டு வயதில் ஜோதிசங்கரன் என்ற மகன் இருந்தான். அழகம்மாள் தனது உறவினரான இதே கிராமத்தைச் சேர்ந்த சந்திவீரன்(16) என்பவனிடம், குழந்தையை பார்த்து கொள்ள சொல்லிவிட்டு, ஆட்டுக்கு புல் அறுக்க காலை 11 மணிக்கு சென்றார். வீட்டிற்கு திரும்பி வந்து பார்த்தபோது குழந்தையை காணவில்லை.

அழகம்மாள் வீட்டு வாசல் படிக்கட்டில் ஒரு கடிதம் இருந்தது. அதில், 30 லட்சம் ரூபாயை திருமங்கலத்தில் கொண்டு வந்து கொடுத்தால், குழந்தையை கன்னியாகுமரியில் பெற்றுக்கொள்ளலாம் என எழுதப்பட்டிருந்தது. சந்திவீரன் மீது சந்தேகப்பட்ட கணேசன், போலீசில் புகார் செய்தார். கடிதத்தை வைத்து விசாரித்த போது, சந்திவீரன் குழந்தையை கொலை செய்து அவரது வீட்டில் புதிதாக கட்டப்பட்டு வரும் கழிவறையில் புதைத்தது தெரிந்தது.

விருதுநகர் தாசில்தார் சந்தன மாரியப்பன் முன்னிலையில் குழந்தை உடலை தோண்டி எடுக்கப்பட்டு விருதுநகர் அரசு மருத்துவமனைக்கு பிரேத பரிசோதனைக்காக அனுப்பி வைத்தனர். சந்திவீரனை போலீசார் விசாரணைக்கு அழைத்துச் சென்றனர். குழந்தையை யாரிடமும், காட்டாமல் போலீசார் கொண்டு சென்று விட்டனர். இதில் மர்மம் உள்ளது என்ற சந்திவீரனின் உறவினர்கள், "போலீசார் வேண்டும் என்றே சந்திவீரன் மீது குற்றம் சுமத்துகின்றனர்' எனக்கூறி விருதுநகர் - சிவகாசி ரோட்டில் மறியல் செய்தனர். அவர்களிடம் தாசில்தார் சந்தன மாரியப்பன், எஸ்.பி.,பிரபாகரன் ஆகியோர் பேச்சு வார்த்தை நடத்தினர். பின்னர் குழந்தையின் உடலை போலீசார், மீண்டும் சம்பவ இடத்திற்கு கொண்டு வந்து காட்டினர். அதன் பின்னர் சந்திவீரன் உறவினர்கள் சமாதானம் அடைந்தனர்.

இரண்டாவது கொலை வழக்கு: கடந்த ஒரு ஆண்டிற்கு முன், இதே கிராமத்தில் தனது பள்ளியில் படித்த நண்பன் சதீஷிடம் கொடுத்த 150 ரூபாயை திருப்பி தரவில்லை என்பதால், அவனை கழுத்தை அறுத்து கொலை செய்த வழக்கில், சந்தி வீரன் போலீசாரால் கைது செய்யப்பட்டான். இந்த வழக்கின் முடிவு தெரியும் முன்னரே, அடுத்த கொலை வழக்கில் சிக்கியுள்ளான்.