விழா தொகுப்புரை:

விழா தொகுப்புரை:

பொங்குதமிழ் மன்றத்தின் கலை இலக்கிய விழா, விடை 7ஆம் நாள், வெள்ளிக்கிழமை, பிந்தாஸ் அரங்கில் சிறப்புற நடந்தேறியது.


நிகழ்ச்சியின் தொடக்கமாக செல்வி.பிரவீணா மகேஷ், செல்வி.வைஷாலி சிறிகாந்த், செல்வி.இலாவண்யா செயக்குமார் ஆகியோர் தமிழ்த்தாய் வாழ்த்துப் பாடினர். தொடர்ந்து தமிழன் மணியன் அவர்கள் மன்றத்தின் சார்பில் அனைவரையும் வரவேற்றார்.

திரு.திருவுடையான் அவர்கள் தலைமையிலான கலைநிகழ்ச்சியின் தொடக்கமாக, பொங்குதமிழ் மன்றத்தின் கலைக்குழுவினர் தமிழிசைப்பாடல்களை பார்வையாளர்களின் பெருத்த பாராட்டுக்களோடு பாடினர்.

தொடர்ந்து திரு.திருவுடையானின் கம்பீரக்குரலில் தமிழிசைப்பாடல்கள் பார்வையாளர்களை மனங்குளிர அமைந்தது.

இவர்களோடு இணைந்து திறம்பட தமது தமிழிசைப் புலமையை வெளிப்படுத்தினர் செல்வி.சுவிதா இலட்சுமினாராயணனும் செல்வி.இலாவண்யா செயக்குமார் அவர்களும்.

திரு.திருவுடையான் அவர்களுக்கு முத்துக்குமார் அவர்கள் மாலை அணிவிக்க தமிழ்நாடன் அவர்கள் பூங்கொத்துக் கொடுத்து வாழ்த்தினர். திரு.நாகா அவர்கள் நினைவுப்பரிசினை வழங்கி பாராட்டினார்.

தொடர்ந்து திரு.நன்னன் அவர்களுக்கு திரு.ஏ.என்.நடராசன் அவர்கள் மாலை அணிவிக்க திரு.பி.டி.நாராயணன் அவர்கள் பூங்கொத்துக் கொடுத்து வாழ்த்தினர்.

தொடர்ந்து பேரா.முனை.நன்னன் அவர்கள் பொங்குதமிழ் மன்றத்தின் கலை இலக்கிய விழா மலரினை வெளியிட, விழாக்கொடையாளர்கள் திரு.செயக்குமார்-நேபசுக்கோ, திரு.சாதிக் -சுப்ரீம் கார்கோ, திரு.பி.டி.நாராயணன் -கல்ப் ஸ்பிக், திரு.இரமேசு -இசுக்கோ, திருமதி.சத்யா இலட்சுமி நாராயணன் ஆகியோர் பெற்றுக்கொண்டனர்.

குவைத்தில் பல ஆண்டுகளாக குழந்தைகளுக்கு தமிழ் பயிற்றுவிக்கும் ஆசிரியைகள் திருமதி.கீதா கல்யாண், திருமதி.இந்திரா செல்வரங்கன், திருமதி.விசாலாட்சி வள்ளியப்பன், திருமதி.பாரதி தமிழ்நாடன் ஆகியோருக்கு
தாம் உருவாக்கிய "தமிழ் எழுத்தறிவோம்" என்ற நூலினை பரிசளித்து வாழ்த்தினார் பேரா.முனை.திரு.நன்னன் அவர்கள்.

தொடர்ந்து, நிகழ்ச்சியினை தொகுத்து வழங்கிய செல்வி.பிரவீணா மகேஷ், செல்வி.கிருத்திகா சக்திவேல் ஆகியோருக்கும், தமிழ்த்தாய் வாழ்த்துப்பாடிய குழந்தைகளுக்கும், தமிழிசைப் பாடல்களைப் பாடியவர்களுக்கும் கலை இலக்கிய விழாவினை ஒட்டி நடைபெற்ற பல்வேறு போட்டிகளில் பங்குபெற்று வெற்றி பெற்றவர்களுக்கும் பரிசுகளை வழங்கி பாராட்டினார்கள்.

கலை இலக்கிய விழாவின் நாட்டியத்தமிழினை செல்வி.சுச்சரிதா ருமேஷ் பாபு அவர்கள் தனது பரதநாட்டியத்தின் மூலம் மிகச் சிறப்பாக அரங்கேற்றினார்.

விழாவின் இறுதியாக, பேரா.முனை.மா.நன்னன் அவர்கள் தனது உரையினை வழங்கினார்கள். மிக ஆழமான சிந்தனைகளை மக்கள் மனதில் நிறுத்தியதோடு நகைச்சுவையாகவும் அமைந்த அவரின் பேச்சு பார்வையாளர்களின் மனதை கொள்ளைகொண்டதென்றால் மிகையில்லை.

உரையின் இறுதியில் பார்வையாளர்களின் பல்வேறு கேள்விகளுக்கு சிறந்த பதில்களைத் தந்து நிகழ்ச்சியினை இறுதி செய்த பேராசிரியர் அவர்களுக்கு திரு.செயக்குமார் அவர்கள் நினைவுப்பரிசினை வழங்கிப் பாராட்டினார்கள்.

நிகழ்ச்சி அரங்கில் பல்வேறு பயன்மிக்க குறுந்தகடுகளும் சிறந்த தமிழ் நூல்களும் விற்பனைக்கு வைக்கப்படிருந்தமை பார்வையாளர்கள் பயனுற அமைந்தது. அதனோடு திருவள்ளுவர் மென்னாடை விற்பனையும் சிற்றிதழ் கண்காட்சியும் நடைபெற்றது.

வேலூர் மொபைல் வேதா குழுவினர், கலை இலக்கிய விழாவிற்கென தொகுத்து வழங்கிய திருக்குறள், ஆத்திசூடி உள்ளிட்ட தமிழ் நூல்கள் கைபேசியில் பதிந்து தரப்பட்டமை அனைவராலும் பாராட்டப்பட்டதோடு, ஆர்வமுடன் தமது கைபேசிகளில் பதிந்துச் சென்றனர்.

கலை இலக்கிய விழாவில் மனது நிறைந்தவர்கள் உதயம் உணவகம் வழங்கிய அருந்தமிழ் உணவுச் சுவையில் வயிறு நிரம்பக் கலைந்தனர்.

புதுமையான முறையில் பாங்குடன் பயனுற அமைந்த நிகழ்ச்சிகள் அனைவராலும் பெரிதும் பாராட்டப்பட்டன.