அரசு வங்கிகளுக்கு ரூ.15,000 கோடி நிதி

ரபீக் · ரபீக் Mon May 24, 2010 11:40 am

அரசு வங்கிகள் தாராளமாக கடன் வழங்க வசதியாக மத்திய அரசு இந்த ஆண்டில் ரூ.15,000 கோடி நிதி அளிக்க முடிவு செய்துள்ளது.

பிரதமர் மன்மோகன் சிங் தலைமையில் டெல்லியில் நேற்று நடந்த மத்திய அமைச்சரவைக் கூட்டத்தில் இந்த முடிவு எடுக்கப்பட்டது. இதுபற்றி அரசு வெளியிட்ட செய்திக் குறிப்பில் கூறியதாவது:

பொதுத் துறை வங்கிகள் தாராளமாக கடன் அளிக்க வசதியாக இந்த நிதி ஆண்டில் (2010&11) ரூ.15,000 கோடி நிதி வழங்கப்படும். இதன்மூலம், வங்கிகளின் கடன் அளிக்கும் வசதி ரூ.1.85 லட்சம் கோடியாக அதிகரிக்கும்.

ரூ.15,000 கோடியில் அரசு வங்கிகள் ஒவ்வொன்றும் பெறக்கூடிய தொகை பற்றி வங்கிகளுடன் ஆலோசனை நடத்தி முடிவு செய்யப்படும். அடுத்த நிதி ஆண்டான 2011&12க்கு தேவையான கூடுதல் முதலீடு குறித்து வங்கிகளுடன் ஆலோசனை நடத்தப்படும். இந்த கூடுதல் நிதியின் மூலம் வேலைவாய்ப்புகளை உருவாக்கக்கூடிய துறைகளான விவசாயம், சிறு மற்றும் நடுத்தர தொழில்கள், தொழில்முனைவோருக்கு தாராள கடனுதவி கிடைக்கும். அது பொருளாதார வளர்ச்சிக்கு உதவியாக அமையும்.

அரசின் இந்த நிதி முதலீடு மூலம் பொதுத் துறை வங்கிகளின் கடன் அளிக்கும் திறன் அதிகரிக்கும். அதிக கடன் அளிப்பதன் மூலம் பொருளாதார வளர்ச்சியை அதிகரிக்க வங்கிகள் உதவும் என்று செய்திக் குறிப்பில் கூறப்பட்டுள்ளது.