கொச்சி அணியில் ரூ.70 கோடி இலவச பங்குகளை வாங்கியது ஏன்? மாடல் அழகி சுனந்தா பேட்டி

கொச்சி அணி ரூ.70 கோடி இலவச பங்கு சர்ச்சையில் சிக்கிய சுனந்தா அளித்துள்ள பேட்டியில் கூறி இருப்பதாவது:-

ஐ.பி.எல். பங்கு விவகாரத்தில் என்னை தேவை இல்லாமல் கஷ்டப்படுத்திவிட்டனர். நான் ஒரு பெண் தொழில் அதிபர். என் வளர்ச்சி பிடிக்காமல் இப்படி செய்து விட்டார்கள் என கருதுகிறேன்.

நான் துபாயில் வெற்றிகரமாக தொழில் செய்து கொண்டிருக்கும் தொழில் அதிபர். நான் அங்கு ரியல் எஸ்டேட் தொழிலில் ஈடுபட்டு இருக்கிறேன். என்னை போல ரியல் எஸ்டேட் தொழிலில் இருந்த சிலர் சேர்ந்து “ரெண்டஸ்வஸ் ஸ்போர்ட்ஸ்” நிறுவனத்தை தொடங்கினார்கள். என்னையும் சேரும்படி கேட்டுக்கொண்டனர். 9 பேரில் நானும் ஒருவராக சேர்ந்தேன்.

அப்போது கொச்சி அணி எங்களுக்கு கிடைக்குமா? இல்லையா? என்பது தெரியாது. ஆனால் எங்களுக்கு கிடைத்து விட்டதை அறிந்து அடுத்தக்கட்ட பணிகளில் நான் தீவிரமாக இறங்கினேன். ஸ்பான்சர்கள் பிடிப்பது, மேலாண்மை, வர்த்தகம் போன்ற பணிகளில் ஈடுபட்டேன். இந்த துறையில் எனக்கு திறமையும், அனுபவமும் இருந்ததால் நான் இதில் ஈடுபடுத்தப்பட்டேன்.

கஷ்டமான வர்த்தகங்களில் இலவச பங்குகள் கொடுப்பது வழக்கம். நான் செய்த பணிகளுக்காக ஆலோசனை கட்டணமாக இலவச பங்குகளை பெற்று கொள்வேன். எனது பணிக்கான பங்காக இது வழங்கப்பட்டது.

சசி தரூர் எனது நண்பர். பார்ட்டிகளுக்கு சென்றதை விட கோவிலுக்கு அதிகமாக சென்றுள்ளேன். அவருடைய தாயாருடன் நான் மிகவும் நட்பாக இருப்பேன். வயதானவர்கள் யாராக இருந்தாலும் நான் நட்புடன் பழகுவேன்.

எனது மகன் தற்போது பிளஸ்-2 படித்து வருகிறான். மே 3-ந்தேதி பரீட்சை தொடங்குகிறது. இந்த பிரச்சினையால் அவன் பரீட்சைக்கு தயாராவதில் பெரும் பாதிப்பு ஏற்பட்டுவிட்டது. ஆனாலும் அவன் எதையும் தைரியமாக எதிர் கொள்பவன். எல்லாம் சரியாகிவிடும். எனக்கும் அவனுக்கும் இது ஒரு சிக்கலான கால கட்டமாகிவிட்டது.

மேலை நாடுகளில் பெண்கள் தனியாக நின்று தொழில் உள்ளிட்ட பல்வேறு விஷயங்களில் சாதித்து வருகிறார்கள். ஆனால் இந்தியாவில் ஒரு பெண் இதுபோன்ற சாதனை நிகழ்த்தினால் இப்படி தேவையற்ற சிக்கல்களை எதிர்கொள்ள வேண்டியது இருக்கிறது.

துபாயில் எங்களை போன்ற தனியாக நின்று தொழில்களில் ஈடுபடும் பெண்களுக்கு நல்ல மரியாதையும் ஒத்துழைப்பும் உள்ளது. ஆனால் இங்குதான் பிரச்சினையை உருவாக்குகிறார்கள்.

ஆனாலும் நான் இந்தியாவை மிகவும் நேசிக்கிறேன். எனக்கு தேசப்பற்று அதிகம். என் தந்தை ராணுவ அதிகாரி. என் சகோதரர்கள் 2 பேரும் ராணுவ அதிகாரியாக உள்ளனர். அவர்கள் எனக்கு மிகவும் ஆதரவாக இருக்கிறார்கள்.

இவ்வாறு அவர் கூறினார்.