மும்பையில் மாடல் அழகி கற்பழிப்பு; 3 போலீசார் உள்பட 6 பேர் அதிரடியாக கைது

மும்பை,

அந்தேரியில் மாடல் அழகியை கற்பழித்த 3 போலீசார் உள்பட 6 பேர் அதிரடியாக கைது செய்யப்பட்டனர். போலீஸ் கமிஷனர் ராகேஷ் மரியா உத்தரவின்பேரில், அந்தேரி எம்.ஐ.டி.சி. போலீசார் இந்த நடவடிக்கையை மேற்கொண்டனர்.

மாடல் அழகி கற்பழிப்பு

மும்பை அந்தேரி பகுதியை சேர்ந்த 25 வயது மாடல் அழகி ஒருவரை கடந்த 21–ந் தேதி செல்போனில் ஒருவர் தொடர்பு கொண்டு பேசினார். அப்போது, தான் அந்தேரியில் உள்ள ஓட்டல் ஒன்றில் தங்கி இருப்பதாகவும், உடனடியாக உங்களை சந்திக்க வேண்டும் என்றும் கூறினார். இதை நம்பி அந்த மாடல் அழகி அங்கு சென்றார். ஓட்டல் அறையில் அந்த நபரை சந்தித்து பேசி கொண்டிருந்தார்.

அப்போது, திடீரென காக்கிநாக்கா போலீஸ் நிலையத்தை சேர்ந்த உதவி போலீஸ் இன்ஸ்பெக்டர்கள் கதாபே, சூரியவன்சி மற்றும் போலீஸ்காரர் கோட்டே ஆகியோர் அங்கு நுழைந்தனர். மாடல் அழகியை விபசார வழக்கில் கைது செய்து நடவடிக்கை எடுப்போம் என்று மிரட்டினர். மேலும், அவரது நகை, பணம் ஆகியவற்றை அபகரித்தனர். இது மட்டுமின்றி, 2 போலீசார் அவரை கற்பழித்தனர்.

கைது

இதனால், அதிர்ச்சிக்குள்ளான அந்த பெண், ஓட்டல் அறையின் கழிவறைக்கு சென்று தனது செல்போன் மூலம் போலீஸ் கமிஷனர் ராகேஷ் மரியாவுக்கு குறுந்தகவல் அனுப்பினார். இதைத்தொடர்ந்து, ராகேஷ் மரியாவின் செல்போனில் இருந்து சம்பந்தப்பட்ட போலீஸ்காரர்களுக்கு அழைப்பு வந்தது. இதனால், பதறிப்போன அவர்கள் சம்பவ இடத்தை விட்டு ஓட்டம் பிடித்தனர்.

இந்த நிலையில், மறுநாள் அந்த பெண், கமிஷனர் ராகேஷ் மரியாவை சந்தித்து, சம்பவத்தை விளக்கினார். பின்னர், ராகேஷ் மரியா உத்தரவின்பேரில் அந்தேரி எம்.ஐ.டி.சி. போலீசார் வழக்குபதிவு செய்து போலீசார் கதாபே, சூரியவன்சி, கோட்டே மற்றும் அவர்களுக்கு உடந்தையாக இருந்த 45 வயது ஒரு பெண் உள்பட 6 பேரை கைது செய்தனர். அவர்களிடம் குற்றப்பிரிவு போலீசார் விசாரணை மேற்கொண்டுள்ளனர்.
-
தினத்தந்தி