கதை கதையாம் கத்தரிக்காய்!

"தாத்தா... அம்மா கத்தரிக்காயே வாங்க மாட்டேங்கறாங்க. பேப்பர்லே கத்தரிக்காய் பற்றி ஒரு தரப்பின் சார்பில் ஆதரித்தும், மற்றொரு தரப்பின் சார்பில் எதிர்த்தும் செய்திகள் வந்ததாம். அதனாலேதான் அம்மா குழம்பி இருக்காங்க. எனக்குக் கத்தரிக்காய்தானே ரொம்பப் பிடிக்கும்! அம்மாவை கத்தரிக்காய் வாங்கி வரச் சொல்லுங்க'' என்று சந்துரு பிடிவாதம் பிடித்தான்.

"சந்துரு... விஞ்ஞானிகள் எம்மாதிரியான கத்தரிக்காயை உபயோகிக்கலாம்னு ஆராய்ச்சி செய்து வருகிறார்கள். அதனால்தான் அம்மா பயப்படறாங்க. நான் நல்லதைப் பார்த்து வாங்கி வருகிறேன். அதுவரை பிடிவாதம் பிடிக்காமல் ஒழுங்கா சாப்பிடு.''

"இப்போ கத்தரிக்காயைப் பற்றி நான் உனக்கு ஒரு கதை சொல்கிறேன் கேள்'' என்றார் தாத்தா.

``ஒரு நாட்டில் ஒரு சாப்பாட்டுராம ராஜா இருந்தான். அவனுக்கு கத்தரிக்காய் என்றால் உயிர். அதனால் சமையல்காரனிடம் தினந்தோறும் சாப்பாட்டில் கத்தரிக்காய் இருக்க வேண்டுமென்று உத்தரவிட்டான்.

அமைச்சரைப் பார்த்து "கத்தரிக்காயைப் பற்றி உங்கள் அபிப்பிராயம் என்ன?'' என்று கேட்டான் ராஜா. அந்த அமைச்சர் சரியான ஜால்ரா. ராஜா எது சொன்னாலும் அதுதான் சரி என்று சொல்லி ராஜாவை புகழ்ந்து தள்ளுவார். அன்றும், ``கத்தரிக்காய்தான் உலகத்திலேயே சிறந்த காய்கறி மகாராஜா!'' என்றார்.

ராஜாவின் உத்தரவுப்படி ஒவ்வொரு தினமும் கத்தரிக்காய் சாம்பார், பொரியல், கூட்டு, கொத்சு, துவையல், பச்சடி என்று ஏதாவது செய்து ராஜாவை மகிழ்வித்தான் சமையல்காரன்.

ஒருநாள் ராஜா அமைச்சரிடம், "இன்று கத்தரிக்காய் சமையல் பிரமாதம் இல்லையா?'' என்றான்.

அமைச்சரும் உடனே, "அதிலென்ன சந்தேகம்! அது சுவையில் மகுடம் என்பதால்தானே கத்தரிக்காயின் தலையில் ஆண்டவனே ஒரு கிரீடம் வைத்துப் படைத்திருக்கிறார்'' என்றார்.

சிறிது காலம் சென்றது. ராஜாவுக்கு கத்தரிக் காய் சாப்பிட்டுச் சாப்பிட்டு அலுத்துவிட்டது. ஆகவே சமையல்காரனைக் கூப்பிட்டு, ``இனி சமையலில் கத்தரிக்காயே சேர்க்கக் கூடாது'' என்றான். பின்னர் அமைச்சரைப் பார்த்து, "கத்தரிக்காயைப் பற்றி நீங்கள் என்ன நினைக்கிறீர்கள் அமைச்சரே?'' என்று கேட்டான்.

"அரசே, தங்கள் கூற்று முற்றிலும் சரியே. கத்தரிக்காய் மோசமான காய்கறி என்பதால்தானே கடவுள் அதை மட்டம்தட்டும் வகையில் அதன் தலையில் ஆணி அடித்துவிட்டான்'' என்றார் அந்த ஜால்ரா அமைச்சர்.

"கேட்டாயா சந்துரு மந்திரியின் பதிலை! அன்று பட்ட பாடு போதாதென்று, பாவம் கத்தரிக்காயை இன்றும் எல்லோரும் வெகுவாக விமர்சிக்கிறார்கள்'' என்று முடித்தார் தாத்தா.

"எனக்குக் கத்தரிக்காயும் பிடிக்குது... அதன் கதையும் பிடிக்குது'' என்று சொல்லிக்கொண்டு விளையாட ஓடினான் சந்துரு.