தூய்மைக்குத் தாமரை!

**சிவா** · **சிவா** Thu May 20, 2010 1:25 pm

பல்வேறு நாட்டுக் கலாச்சாரங்களில், தூய்மையின் அடையாளமாகத் தாமரை மலர் கருதப்படுகிறது. காரணம் இது தன்னைத் தானே தூய்மைப்படுத்திக் கொள்ளும் தனிச் சிறப்பான தன்மையைப் பெற்றிருப்பது தான். தாமரை இலையானது அதன் மேற்பரப்பில் எந்த அழுக்கையும் தங்க விடுவதில்லை.

தாமரை இலையில் காணப்படும் கெட்டியான மெழுகுப் பூச்சு, தூசு, பாக்டீரியா போன்றவற் றை அதில் ஒட்டிக்கொள்ள முடியாமல் செய்கிறது. மழை பெய்யும்போது, இலையின் மீது பட்டும் படாமலும் இருக்கும் தூசுகளும், தீய நுண்ணுயிரிகளும் கூட தண்ணீரால் அடித்துச் செல்லப்பட, தாமரை மேலும் சுத்தமாகப் `பளிச்'சிடுகிறது.

நமக்குக் கிடைத்திருக்கும் வரலாற்றுப் பதிவுகளும், கற்படிவங்களும் தாமரை ஒரு பழமையான மலர் என்பதைப் பறைசாற்றுகின்றன. போதுமான தண்ணீரும், சூரிய ஒளியும் இருக்கும்போதுதான் தாமரை மலர்கிறது. பல ஆண்டுகளுக்கு இதன் விதைகள் முளைப்புத் திறனுடன் இருக்கும்.

ஆசியக் கண்டத்தில் தண்ணீர் தோட்டங்களில் பெருமளவில் தாமரை வளர்க்கப் படுகிறது. தாமரையின் அனைத்துப் பாகங்களும் உண்ணக்கூடியவை. தாமரையின் வேர்களும், தண்டுகளும் சமைத்தோ, ஊறுகாய் இட்டோ சாப்பிடப்படுகின்றன. தாமரை மலர், அலங்காரத்துக்கும், இதன் இலைகள் உணவைப் பொட்டலம் கட்டவும் பயன்படுத்தப்படுகின்றன. தாமரை விதைகள் உலர்த்தப்பட்டோ, `பாப்கார்ன்' போல பொரிக்கப்பட்டோ சாப்பிடப்படுகின்றன. `மூன் கேக்' போன்ற சீன இனிப்பு வகைகளில் தாமரை விதைப் பசை அதிகமாகப் பயன்படுத்தப்படுகிறது. தாமரையின் வேரும், விதைகளும் ஊட்டச்சத்து மிக்கவை.