ஹாக்கி அரங்கில் மீண்டும் கே.பி.எஸ்.கில்

ஹாக்கி அரங்கில் மீண்டும் கே.பி.எஸ்.கில்!: டில்லி ஐகோர்ட் அதிரடி தீர்ப்பு


புதுடில்லி: இந்திய ஹாக்கி கூட்டமைப்பை கலைத்தது செல்லாது என, டில்லி ஐகோர்ட் அதிரடியாக உத்தரவிட்டுள்ளது. இதையடுத்து கே.பி.எஸ். கில் மீண்டும் ஆதிக்கம் செலுத்த காத்திருக்கிறார்.

இந்திய ஹாக்கி கூட்டமைப்பின்(ஐ.எச்.எப்.,) தலைவராக சுமார் 15 ஆண்டு காலம் கே.பி.எஸ்.கில் இருந்தார். இவரது பதவி காலத்தில் அணியின் செயல்பாடு படுமோசமானது. இதன் உச்சக்கட்டமாக 2008ல் ஒலிம்பிக் போட்டிக்கு தகுதி பெற தவறியது. அடுத்து, அஸ்லான் ஷா தொடருக்கான அணியில் வீரர் ஒருவரை சேர்க்க, ஹாக்கி கூட்டமைப்பின் செயலராக இருந்த ஜோதிகுமரன் லஞ்சம் பெற்றது அம்பலமானது. இதனை ரகசியமாக படம் பிடித்து ஒரு "டிவி' சேனல் ஒளிபரப்பியது. இதையடுத்து ஹாக்கி கூட்டமைப்பை, இந்திய ஒலிம்பிக் சங்கம்(ஐ.ஒ.ஏ.,) கலைத்தது. இதன் அங்கீகாரத்தை மத்திய விளையாட்டு துறை அமைச்சகம் ரத்து செய்தது. பின், தற்காலிகமாக "ஹாக்கி இந்தியா' என்ற அமைப்பு ஏற்படுத்தப்பட்டது.

ரூ.10 ஆயிரம் அபராதம்:

இதனை எதிர்த்து கே.பி.எஸ்.கில் வழக்கு தொடர்ந்தார். இம்மனுவை விசாரித்த டில்லி ஐகோர்ட்டின் நீதிபதி எஸ்.முர்ல்திகார், மத்திய அரசு மற்றும் ஒலிம்பிக் சங்கத்தின் உத்தரவுகளை தள்ளுபடி செய்தார். தவிர, தலா 10 ஆயிரம் ரூபாய் அபராதமும் விதித்தார். இது தொடர்பாக தீர்ப்பில் கூறியிருப்பதாவது:

இந்திய ஒலிம்பிக் சங்கம் இயற்கை நீதிக்கு எதிராக செயல்பட்டுள்ளது. ஹாக்கி கூட்டமைப்புக்கு விளக்கம் கேட்டு நோட்டீஸ் அனுப்பாமல், அதனை கலைத்தது ஏற்றுக் கொள்ள முடியாது. எனவே, 2008 மற்றும் 2009ல் இந்திய ஒலிம்பிக் சங்கம் பிறப்பித்த உத்தரவு தள்ளுபடி செய்யப்படுகிறது. இதே போல 2008, 2009ல் ஐ.எச்.எப்., அங்கீகாரத்தை ரத்து செய்த மத்திய விளையாட்டு துறை அமைச்சகத்தின் உத்தரவும் தள்ளுபடி செய்யப்படுகிறது.

விளையாட்டு அமைப்புகள் ஜனநாய முறைப்படி செயல்பட அனுமதிக்க வேண்டும். ஓரளவுக்கு சுயாட்சி வழங்கலாம். அரசு தரப்பில் ஒழுங்குப்படுத்துகிற பணியை மட்டும் செய்யலாம். சர்வதேச போட்டிகளில் தோல்விகளை தவிர்க்க முடியாது. இதற்காக சிலர் மீது பழி போடுவது, தேசிய விளையாட்டின் வளர்ச்சிக்கு உதவாது. பிரச்னைகள் பற்றி அனைத்து தரப்பிலும் முறைப்படி விசாரிக்க வேண்டும். கடந்த காலத்தை மறந்து விட்டு, புதிய அத்தியாயத்தை துவக்க வேண்டும்.

இவ்வாறு தீர்ப்பில் கூறப்பட்டுள்ளது.

ஏற்கனவே தேர்தலை நடத்த முடியாமல் திணறும் "ஹாக்கி இந்தியா' அமைப்புக்கு, டில்லி ஐகோர்ட் உத்தரவு பெரும் சிக்கலை ஏற்படுத்தியுள்ளது. இனி,கே.பி.எஸ்., கில் கை ஓங்கும் என்பதால், இந்திய ஹாக்கியில் மீண்டும் சர்ச்சைகளை எதிர்பார்க்கலாம்.

அடுத்தகட்ட நடவடிக்கை

இந்திய ஒலிம்பிக் சங்க தலைவர் கல்மாடியின் தூண்டுதலின் பேரில் தான், 2008ல் ஐ.எச்.எப்., தலைவர் பதவியில் இருந்து கே.பி.எஸ். கில் நீக்கப்பட்டார். இவரை மறைமுகமாக சாடிய கே.பி.எஸ். கில் கூறுகையில்,""நீதிக்கு வெற்றி கிடைத்துள்ளது. டில்லி ஐகோர்ட் உத்தரவை படித்த பின், அடுத்தகட்ட நடவடிக்கை பற்றி ஐ.எச்.எப்., கூட்டத்தில் விவாதித்து முடிவு எடுப்போம். சிலரது தனிப்பட்ட விருப்பங்களுக்காக தான் ஹாக்கி கூட்டமைப்பு கலைக்கப்பட்டது. "ஹாக்கி இந்தியா' என்பது வெறும் நிழல் தான். அப்படி ஒரு அமைப்பு செயல்பட்டதாகவே தெரியவில்லை. உள்ளூர் தவிர, சர்வதேச ஹாக்கி கூட்டமைப்பின் ஆதரவும் எங்களுக்கு உள்ளது,''என்றார்

இரண்டு கில் கையில்...

மும்பை ஹாக்கி சங்கத்தின் செயலரும் முன்னாள் ஒலிம்பிக் வீரருமான குர்பக்ஸ் சிங் கிரேவல் கூறுகையில்,""இந்திய ஹாக்கி கூட்டமைப்பு மீண்டும் மலர இருப்பது மகிழ்ச்சி அளிக்கிறது. மத்திய விளையாட்டு துறை அமைச்சர் எம்.எஸ்.கில் மற்றும் கே.பி.எஸ்.கில் இணைந்து செயல்பட வேண்டும். இவர்கள், இந்திய ஒலிம்பிக் சங்க நிர்வாகிகளுடன் பேசி, பிரச்னைகளுக்கு தீர்வு காண வேண்டும்,''என்றார்.