தமிழகத்தில் சட்ட மேலவை அமைக்க குடியரசுத் தலைவர் ஒப்புதல்

தமிழகத்தில் மேலவை அமைக்க குடியரசுத் தலைவர் பிரதிபா பாட்டீல் ஒப்புதல் அளித்துள்ளார். இதையடுத்து, மத்திய அரசு கெஜட்டில் இந்த உத்தரவு வெளியிடப்பட்டது.
தமிழகத்தில் மீண்டும் மேலவை அமைப்பதற்கான மசோதா நாடாளுமன்றத்தில் தாக்கல் செய்யப்பட்டது. மக்களவை, மாநிலங்களவை ஆகிய இரண்டிலும் கடந்த வாரம் பெரும்பான்மை பலத்துடன் இந்த மசோதா நிறைவேறியது.

பின்னர், குடியரசுத் தலைவர் பிரதிபா பாட்டீலின் ஒப்புதல் பெற மசோதா அனுப்பி வைக்கப்பட்டது. தமிழகத்தில் மீண்டும் மேலவை அமைக்க ஒப்புதல் அளித்து பிரதிபா பாட்டீல் கையெழுத்திட்டார். இதைத்தொடர்ந்து, தமிழகத்தில் மேலவை அமைப்பதற்கான உத்தரவு மத்திய அரசின் கெஜட்டில் நேற்று வெளியிடப்பட்டது.

அதில் கூறியிருப்பதாவது:

‘தமிழ்நாடு மேலவை சட்டம்& 2010’ மசோதாவை, கடந்த 18ம் தேதி நாடாளுமன்றம் நிறைவேற்றி அனுப்பியது. இதற்கு குடியரசுத் தலைவர் ஒப்புதல் வழங்கியுள்ளார். இதன்படி தமிழகத்தில் அமையும் மேலவையில் 78 உறுப்பினர்கள் இடம் பெறுவார்கள். சட்டப்பேரவை உறுப்பினர்களால் 26 உறுப்பினர்களும், உள்ளாட்சி அமைப்புகள் மூலம் 26 உறுப்பினர்களும், பட்டதாரிகள் சார்பில் 7 உறுப்பினர்களும், ஆசிரியர்கள் சார்பில் 7 உறுப்பினர்களும் தேர்தல் ஆணையம் மூலம் தேர்ந்தெடுக்கப்படுவார்கள். கலை, இலக்கியம், சமூக சேவகர்கள் சார்பில் 12 பேர், ஆளுநர் உத்தரவின் பேரில் உறுப்பினர்களாக நியமிக்கப்படுவார்கள். இவ்வாறு மத்திய அரசு உத்தரவில் கூறப்பட்டுள்ளது.

குடியரசுத் தலைவர் ஒப்புதலை தொடர்ந்து, மேலவை அமைக்கும் பணி தீவிரப்படுத்தப்படும். ஏற்கனவே புதிய சட்டப்பேரவை வளாகத்தில் மேலவை அமைக்கும் பணி வேகமாக நடந்து வருகிறது. பிரமாண்டமான அரங்கில் 120 பேர் அமரும் வகையில் இருக்கைகள் தயாராகி வருகின்றன.

மேலவை செயலகம், மேலவை தலைவர், துணைத்தலைவர், அவை முன்னவர் அறைகள் தயாராகி வருகின்றன. பின்னர், உறுப்பினர்களை தேர்ந்தெடுக்கும் பணி நடைபெறும். தொகுதி சீரமைப்பு அடிப்படையில் பட்டதாரிகள், ஆசிரியர்கள், உள்ளாட்சி அமைப்புகளின் பிரதிநிதிகள் தனித்தனியாக தேர்ந்தெடுக்கப்படுவார்கள். இதையடுத்து, 24 ஆண்டுகளுக்கு பிறகு தமிழகத்தில் மீண்டும் மேலவை கூட்டத்தொடர் தொடங்கும். வரும் டிசம்பரில் மேலவை பணிகள் முடியும் என்று எதிர்பார்க்கப்படுகிறது.