பன்றிக்காய்ச்சலுக்குப் பயப்படணுமா?

மருத்துவத் துறை ஒவ்வொரு நாளும் ஒரு சென்ட்டி மீட்டர் வளர்ச்சி அடைந்தால், புது வகை நோய்க்கிருமிகள் ஒரு மீட்டருக்கு வளர்ந்து மக்களைப் பதம் பார்க்கின்றன. பறவைக் காய்ச்சல், எலிக் காய்ச்சல் வகையறாவில் மருத்துவத் துறைக்கு சவால் விடும் சமீபத்திய சவால் பன்றிக்காய்ச்சல். மாவோயிஸ்ட்டுகளுக்கு இணையாக இப்போது இந்தியாவைப் பதற வைத்துக் கொண்டு இருக்கிறது பன்றிக் காய்ச்சல்.


விமான நிலையத்தில் கடத்தல்காரர்களைவிட இந்த காய்ச்சல்காரர்களைப் பிரித்து மேய்கிறார்கள் அதிகாரிகள். மருத்துவமனையில் தனி அறையில் தனிமைப்படுத்தப்படுகிறார்கள் நோயாளிகள். ஆனாலும், எப்படியோ பரவிக்கொண்டு இருக்கிறது பன்றிக் காய்ச்சல்.


இன்ஃபுளுவன்சா ""A'' வைரஸின் துணைப் பிரிவான H1N1 என்ற கிருமிதான் பன்றிக் காய்ச்சலின் பாஸ். கடந்த ஏப்ரல் மாதம்தான் இந்த H1N1 - ஐக் கண்டு பிடித்தார்கள். மற்ற காய்ச்சல்கள் பறவை, எலி, கொசு மூலம் பரவும். எனவே, அவற்றில் இருந்து விலகி இருந்தாலே காய்ச்சல் பரவுவதைக் கட்டுப்படுத்தி விடலாம். ஆனால், இந்த பன்றிக் காய்ச்சல் மனிதனிடமிருந்து மனிதனுக்குப் பரவும். அதனால்தான் இவ்வளவு பதற்றம். இன்றுவரை பன்றிக் காய்ச்சலுக்கு உலகம் முழுக்க 163 பேர் பலியாகி இருக்கிறார்கள். 29 ஆண்டுகளுக்கு முன் எய்ட்ஸ் ""மிகப் பெரிய தொற்றுநோய்'' என்று அறிவிக்கப்பட்டது. இப்போது பன்றிக் காய்ச்சலைத் தொற்றுநோயாக அறிவித்திருக்கிறது உலக சுகாதார நிறுவனம்.


H1N1 வைரஸ் புதுவகை வைரஸ். அமெரிக்காவில் பன்றிகளுக்குக் காய்ச்சல் ஏற்படுத்தும் வைரஸின் ஜீனும், இந்த வைரஸ் ஜீனும் ஓரளவுக்குப் பொருந்தி போயிருக்கிறது. ஒருவேளை, இந்த வைரஸ் பன்றியில் இருந்து பரவியிருக்கலாம் என்ற சந்தேகத்தில்தான் இதை பன்றிக் காய்ச்சல் என்று கூறுகிறார்கள். இதைத் தவிர பன்றிக்கும் இந்தக் காய்ச்சலுக்கும் வேறு எந்த சம்பந்தமும் இல்லை. பன்றிக் காய்ச்சல் வந்தவர்கள் தங்கள் மூக்கு மற்றும் வாயை மூடியபடி இருக்க வேண்டும். வீட்டை விட்டு வெளியேறக் கூடாது. கையை எப்போதும் சுத்தமாக வைத்திருக்க வேண்டும். தண்ணீர், ஜூஸ் போன்ற திரவ உணவுகளை அதிகம் எடுத்துக் கொள்ள வேண்டும். குறைந்தபட்சம் 2 மணி நேரத்துக்கு ஒருமுறை நல்ல சோப், கிருமிநாசினி போட்டுக் கை கழுவ வேண்டும்.


அதிக பாதிப்புகள் இல்லையென்றாலும், ஒரு சிலருக்கு இது நுரையீரல் பாதிப்பை ஏற்படுத்தி மரணத்தை ஏற்படுத்தி வருகிறது. இந்த நோயை கட்டுப்படுத்தும், குணப்படுத்தும் மருந்துகள் வந்து விட்டன.'' என்று நம்பிக்கை கொடுக்கிறார் சென்னை மலர் மருத்துவமனை பொதுநல மருத்துவர், டாக்டர் ஜே.பிரபாகரன். கூடவே, ""மருத்துவர் ஆலோசனை இல்லாமல் மருந்துகள் எடுத்துக் கொள்ளக் கூடாது'' என்றும் எச்சரிக்கிறார்.

சூப்பர் அ௫மையான கட்டுரை