சர்க்கரை வியாதியா? நாய் குரைக்கும்

நீங்கள் சர்க்கரை நோய் உள்ளவரா? உங்களுக்கு சர்க்கரை அளவு மிகவும் குறைந்து விட்டால், உங்கள் செல்ல நாய் காட்டிக்கொடுக்கும்; உங்கள் உயிரை காப்பாற்றி விடும்.ஆம், சர்க்கரை நோய் மோப்ப நாய்கள், இந்தியாவில் உருவாகும் போது, இதை எதிர்பார்க்கலாம்; இப்போதைக்கு பிரிட்டனில் தான் இந்த வகை நாய்கள் உருவாக்கப்பட்டு வருகின்றன.


அயர்லாந்தில் உள்ள குயின்ஸ் பல்கலைக்கழகத்தில் இது தொடர்பாக சில மாதங்களாக மருத்துவ நிபுணர்கள் ஆய்வு மேற்கொண்டனர். 212 சர்க்கரை நோயாளிகளை வைத்து இந்த ஆய்வு நடத்தப்பட்டது.இவர்களில் சிலருக்கு, ரத்தத்தில் சர்க்கரை அளவு மிகவும் குறைந்து வந்தது. அதை மருத்துவ பரிசோதனையில் கண்டுபிடிக்கும் முன், செல்ல நாய்களை மோப்பம் பிடிக்க வைத்து கண்டுபிடிக்க முடியும் என்று நிபுணர்கள் மதிப்பிட்டனர். குற்றவாளிகள் விட்டுச்சென்ற தடயம் முதல், போதைப்பொருட்களை மோப்பம் பிடிக்கும் நாய்களுக்கு, சர்க்கரை நோய் தொடர்பான மோப்ப திறன் கண்டிப்பாக இருக்கும் என்று அது தொடர்பான பயிற்சி அளிக்கப்பட்டது.


சில நாய்களுக்கு இந்த வகையில் மோப்ப பயிற்சி அளிக்கப்பட்டு, அதன் எஜமானர்களிடம் திருப்பி ஒப்படைக்கப்பட்டன.அவர்கள் ஏற்கனவே சர்க்கரை நோயால் பாதிக்கப்பட்டவர்கள்; அவர்களில் சிலருக்கு ரத்தத்தில் சர்க்கரை அளவு வெகுவாக குறைந்தபோது அதை மோப்பம் பிடித்தன இந்த நாய்கள். அவர்களுக்கு இப்படி ஒரு நிலைமை வந்ததை அறிந்து, அவர்களை சுற்றிச் சுற்றி வந்து நாய் குரைத்தது; அவர்கள் கன்னத்தில் நாக்கால் நக்கியது; அவர்களை நகர விடாமல் பிராண்டவும் செய்தது.


"மோப்ப சக்தி மூலம், சர்க்கரை அளவு குறைந்து இருப்பதை அறிந்தவுடன் நாய்கள் இப்படி தான் செய்யும். எங்கள் ஆய்வுக்கு 90 சதவீதம் வெற்றி கிடைத்து விட்டது. இனி இப்படிப்பட்ட செல்ல நாய்களுக்கு மோப்ப சக்தி பயிற்சியை அளிக்கலாம்; அதன் மூலம், சர்க்கரை அளவு குறைவதை அறிந்து உடனே டாக்டரிடம் போகலாம்' என்று நிபுணர்கள் கூறியுள்ளனர்.பல்கலைக்கழகத்தின் ஆய்வு முடிவுகளை வைத்து, ஒரு தன்னார்வ அறக்கட்டளை இதுவரை 17 நாய்களுக்கு சர்க்கரை வியாதி மோப்ப சக்தி பயிற்சியை அளித்து உள்ளது. "இன்னும் பல நாய்களுக்கு மோப்ப சக்தி அளித்து, வர்த்தக ரீதியாக விற்பனை செய்வது பற்றியும் பரிசீலித்து வருகிறோம்' என்று அறக்கட்டளை தரப்பில் கூறப்பட்டுள்ளது.

சூப்பர் அ௫மையான கட்டுரை