அத்வானி - சோனியா பழக்கம் : கருணாநிதி ஏக்கம்

sathyan · sathyan Fri May 14, 2010 1:08 am

அத்வானி - சோனியா பழக்கம் : கருணாநிதி ஏக்கம்
மே 14,2010,00:00 IST

அத்வானி - சோனியா பழக்கம் : கருணாநிதி ஏக்கம் Tblfpnnews_82802546025

சென்னை : ''டில்லியில் சோனியாவும், அத்வானியும் திருமண விழாவில் பங்கேற்கும் போது, அருகருகே அமர்ந்து, ஒருவருக்கொருவர் குசலம் விசாரித்துக் கொண்டு, அன்போடு பழகுவதைப் பார்க்கும் போது, தமிழகத்தில் இந்த நிலை இல்லையே என்ற பொறாமை ஏற்படுகிறது,'' என முதல்வர் கருணாநிதி பேசினார்.

தி.மு.க., அரசு பதவியேற்று ஐந்தாம் ஆண்டு துவக்கம் மற்றும் 19வது ஆண்டாக முதல்வர் பதவியில் கருணாநிதி தொடர்வதற்கு பாராட்டு தெரிவிக்கும் வகையில், காங்கிரஸ் எம்.எல்.ஏ., சுதர்சனம், பா.ம.க., எம்.எல்.ஏ., வேல்முருகன், மார்க்சிஸ்ட் எம்.எல்.ஏ., பாலபாரதி, இந்திய கம்யூனிஸ்ட் கட்சி எம்.எல்.ஏ., சிவபுண்ணியம் ஆகியோர் சட்டசபையில் வாழ்த்தும், பாராட்டும் தெரிவித்தனர். ஆளுங்கட்சியின் சார்பில் நிதியமைச்சர் அன்பழகன் மற்றும் சபாநாயகர் ஆவுடையப்பன் ஆகியோரும் முதல்வருக்கு வாழ்த்து தெரிவித்தனர்.

இதைத் தொடர்ந்து, முதல்வர் வழங்கிய ஏற்புரை: எந்த பண்பாடும், நாகரிகமும் அரசியலில் தலை காட்ட வேண்டுமென தமிழகத்தின் மாபெரும் தலைவர்கள் பாடுபட்டார்களோ, அவர்களின் எண்ணம் சட்டசபையில் இன்று ஓரளவுக்கு ஈடேறியிருக்கிறது. அது முழுமையாக ஈடேற வேண்டுமென்ற கருத்து எனக்கு எப்போதும் உண்டு. கோர்ட்டில் எதிரெதிரே வாதாடி விட்டு, கோர்ட்டுக்கு வெளியே வந்தவுடன் எப்படி இரு வக்கீல்களும் தோழமையோடு கைகோர்த்துக் கொண்டு செல்கின்றனரோ, அந்த நிலைமை அரசியலிலும் வர வேண்டும். டில்லியில் சோனியாவும், அத்வானியும் ஒரு திருமண விழாவில் பங்கேற்கும் போது, அருகருகே அமர்ந்து, ஒருவருக்கொருவர் குசலம் விசாரித்துக் கொண்டு, அன்போடு பழகுவதைக் காண்கிறோம். இதைக் காணும் போது மகிழ்ச்சி ஏற்படுவதோடு, எனக்கு பொறாமை தான் ஏற்படுகிறது. அத்வானியோடு சோனியா பேசுகிறாரே என்ற பொறாமையால் அல்ல; இந்த நிலை தமிழகத்தில் இல்லையே என்ற காரணத்தால் எழுகின்ற பொறாமை.

காமராஜரை நான் சாடாத கூட்டங்கள் இல்லை; எழுதாத கட்டுரைகள் இல்லை. ஆனால், அவர், 'பெருந்தலைவர்' என்பதற்கேற்ப, எப்படி நடந்து கொண்டார் என்பதை அவருடைய வரலாறு விளக்கும். அண்ணாவால் தமிழ் மாநாடு சென்னையில் நடத்தப்பட்டபோது, அதன் முதன் விழாவை துவக்கி வைத்தவர் காமராஜர். எம்.ஜி.ஆர்., இருந்த போது, அவருக்கும், எனக்கும் எத்தனையோ பூசல்கள்; எத்தனையோ கடுமையான வாக்குவாதங்கள் இந்த சபையில் நடந்ததுண்டு. நான் அடுக்கடுக்காய் எடுத்து வைத்த குற்றச்சாட்டுகளுக்கெல்லாம் அவர் வேகமாக அளித்த பதில்கள் இன்றும் என் நினைவில் உள்ளன.

அண்ணா மறைந்தபோது, நான் முதல்வர் ஆக வேண்டாம் என என் வீட்டில் உள்ளவர்கள் தடுத்தபோது, 'இவர் தான் முதல்வர் ஆக வேண்டும்; நீங்கள் யாரும் தடுக்கக்கூடாது' என்று அவர்களை சமாதானப்படுத்தி, என்னை முதல்வர் பதவியில் உட்கார வைக்கும் பெரும் பொறுப்பை ஏற்றவர் எம்.ஜி.ஆர்., அந்தப் பண்பாடு சிதறாமல், செத்துப் போகாமல் காப்பாற்ற வேண்டிய பொறுப்பை, தமிழகத்தில் உள்ள நம்மைப் போன்றவர்கள் ஏற்றுக்கொள்ள வேண்டும். இவ்வாறு முதல்வர் பேசினார்.