உடல் தூய்மையும், தொழுகையும்!

ஒவ்வொரு நாளும் ஐந்து வேளை இறைவனைத் தொழுவது முஸ்லீம்கள் மீதி விதிக்கப்பட்ட கட்டாயக் கடமையாகும். காலைக் கதிரவன் உதிப்பதற்கு முன்னும், சூரியன் உச்சிக்கு வந்த பின்னும், சூரியன் மறைவதற்கு முன்னுள்ள மாலை வேளையிலும், சூரியன் மறைந்த பிறகும், இரவுப் போதிலும் இறைவனை வழிபடுவது கடமை ஆகும்.

ஐவேளை தொழுகின்றவரைப் பற்றி நபிகள் நாயகம் (ஸல்) கூறும்போது, ""உங்களில் ஒருவரின் வீட்டு வாசலில் ஆறு ஒன்று ஒடிக் கொண்டிருக்க அதில் அவர் தினமும் ஐந்து வேளை குளிக்கின்றார். அவர் மேனியில் அழுக்கு இருக்குமா? கூறுங்கள்'' என்று தோழர்களிடம் வினவினார்.

""அழுக்குகளில் எதுவும் மிஞ்சி இராது'' என நபித்தோழர்கள் மறுமொழி பகர்ந்தனர்.

""இது ஐவேளைத் தொழுகைக்கான உவமையாகும்; இதேபோல் தொழுகையின் மூலம் அல்லாஹ் பாவங்களை அகற்றுகின்றான்'' என்று நபிகள் நாயகம் தெளிவுபடுத்தினார்.

தொழுகைக்கு முன்னால், தொழ எண்ணுபவர் தன் முகம், கை, கால்களை முறைப்படி சுத்தம் செய்து கொள்ள வேண்டும்.

""இறையடியார்களே! நீங்கள் தொழுவதற்காக நிற்க நாடினால், அதற்கு முன்னர் உங்கள் முகங்களையும், கைகளை முழங்கை வரையும், கால்கள் கணுக்கால் வரையும் கழுவிக் கொள்ளுங்கள்; உங்கள் கைகளை (ஈரக் கையால்) தடவிக் கொள்ளுங்கள். (அல்.குர்ஆன் 5:6)

உடல் உறுப்புகளைச் சுத்தம் செய்யும்போது குறைந்த பட்சம் ஒரு தடவை கழுவுவது கட்டாயம் என்பதை நபி(ஸல்) அவர்கள் அறிவுறுத்தியுள்ளார். மேலும் அவரே அவ்வுறுப்புகளை இரண்டு, மூன்று தடவைகள் கழுவியுள்ளார் என்றாலும், மூன்று தடவைக்கு மேல் அதிகப்படுத்தியது இல்லை.

உடல் தூய்மையின்றி எந்தத் தொழுகையும் ஏற்கப்படமாட்டாது. ""முகம், கை, கால்களைத் தண்ணீரால் சுத்தம் செய்தவர்கள் மறுமை நாளில் ஒளியுடன் திகழ்வர்'' என்றும், ""தூய்மை, இறை நம்பிக்கையின் ஒரு பகுதி'' என்றும் நபிகள் கூறியுள்ளது இங்கு நினைவில் கொள்ளத் தக்கது.

உடல் உறுப்புகளை நன்கு முழுமையாகக் கழுவுவது அரபியில், "ஒளூ' என்று கூறப்படும். அதே சமயம், உடல் உறுப்புகளைச் சுத்தம் செய்ய அதிக அளவு தண்ணீரைப் பயன்படுத்தக்கூடாது. "வீண் விரயம்' என்பது மனித தர்மத்திற்கு எதிரானது.

"சுத்தம் சோறு போடும்', "கந்தையானாலும் கசக்கிக் கட்டு' என்னும் பழமொழிகள் தமிழில் உண்டு. தூய்மையான உடலில்தான் தூய்மையான எண்ணம் பிறக்கும். தூய்மையே இறைவனை நெருங்கச் செய்யும்! இன்று உலக சுகாதாரம் பற்றியும், அதன் அவசியத்தைப் பற்றியும் சுற்றுப்புறச் சூழல், மாசுக்கட்டுப்பாடு என்பதைப் பற்றியெல்லாம் ஆய்வாளர்கள் அறிவுறுத்திக் கொண்டிருக்கின்றார்கள் என்பது இங்கு ஒப்பு நோக்கத்தக்கது.

"உடல் துப்புரவு' என்பது உடலுடன் முடிந்துவிடுவதில்லை; மன ஆரோக்கியம், நற்சிந்தனைகள் முதலியனவும் ஏற்பட அது ஏதுவாகின்றது. எனவே உடல் தூய்மை காத்து நாம் தொழுகையில் ஈடுபடுவோம்.

மிகவும் சரியான விளக்கம் கூறப்பட்டுள்ளது நன்றி சகோதரா