சுதந்திரம்!

**சிவா** · **சிவா** Thu Aug 19, 2010 12:23 am

வணிகம் செய்ய வந்து இங்கே
வளைத்துக் கொண்டார் நாட்டையே - அந்த
வேட்டைக்காரர் ஓடிடவே
விரட்டிப் பெற்ற சுதந்திரம்!

சிறைக்குச் சென்று செக்கிழுத்து
சின்னப் பட்டு மேனியே - உயிர்த்
தியாக வேள்வித் தீயினிலே
தேடிப் பெற்ற சுதந்திரம்!

உரிமை தன்னைக் கேட்டதாலே
உயிரை மாய்த்த பறங்கியர் - நமது
ஊரை விட்டு ஓடிடவே
உழைத்துப் பெற்ற சுதந்திரம்!
தாயின் நாட்டில் அடிமையாக்கி
தூக்கில் போட்ட வெள்ளையர் - நாட்டை
தானே விட்டுப் பறந்திடவே
சரியாய்ப் பெற்ற சுதந்திரம்!

கத்தி இன்றி ரத்தமின்றி
காண வேண்டும் சுதந்திரம் - என்று
காந்தியண்ணல் வழியினிலே
கண்டெடுத்த சுதந்திரம்!

வீழ்ந்து போன நமது நாட்டின்
வளத்தை மீண்டும் காணவே - நாளும்
வேட்கை கொண்டு ஒன்றுபட்டு
வெற்றி கொண்ட சுதந்திரம்!

- செ.சு. மலரடியான்