காய்ச்சலுக்கு கொடுத்த மாத்திரையால் சிறுமியின் பார்வை பறிபோனது

சபீர் · சபீர் Wed Apr 28, 2010 1:48 am

காய்ச்சலுக்கு கொடுத்த மாத்திரையால் சிறுமியின் பார்வை பறிபோனது

காய்ச்சலுக்கு கடையில் வாங்கி சாப்பிட்ட மாத்திரையால் சிறுமியின் பார்வை பறிபோய் உள்ளது.

தண்டையார்பேட்டை திருவொற்றியூர் நெடுஞ்சாலை டோல்கேட் பகுதியை சேர்ந்தவர் தேவேந்திரன், கார் டிரைவர். இவரது மனைவி கமலா. இவர்களுக்கு சுரேகா (13) என்ற மகளும் நவீன் (10) என்ற மகனும் உள்ளனர். சுரேகாவுக்கு 2008ம் ஆண்டு காய்ச்சல் வந்ததால் அப்பகுதியில் உள்ள ஒரு டாக்டரிடம்அழைத்து சென்றனர். அவர் எழுதி கொடுத்த மாத்திரைகளை மருந்து கடையில் வாங்கி கொடுத்துள்ளனர்.

இரண்டு வேளை மாத்திரை சாப்பிட்டவுடன் சுரேகாவின் கை, கால், முகம் என உடல் முழுவதும் சிறு சிறு கட்டிகள் வந்துள்ளன. வாய், காது, மூக்கில் புண் ஏற்பட்டது. இரண்டு கண்களிலும் புண் ஏற்பட்டு ரத்தம் கட்டியதால் சிறுமி வலியால் துடித்தாள். அதிர்ச்சி அடைந்த பெற்றோர் ஸ்டான்லி அரசு மருத்துவமனைக்கு அழைத்து சென்றனர். அங்கு சுரேகாவுக்கு சிகிச்சை அளித்த பின் கை, கால், முகத்தில் ஏற்பட்ட கட்டிகள் மற்றும் வாய், காது, மூக்கில் ஏற்பட்ட புண் சரியாகிவிட்டது.

கண்களில் கட்டி இருந்த ரத்தத்தை டாக்டர்கள் அகற்றினர். அதன்பின்னரும் சுரேகாவுக்கு பார்வை சரியாக தெரியவில்லை. வேதனை அடைந்த தேவேந்திரன், சுரேகாவை தனியார் கண் மருத்துவமனைக்கு அழைத்து சென்றார். அங்கு டாக்டர்கள் சுரேகாவின் கண்களில் அறுவை சிகிச்சை செய்தனர். அதன்பின் சுரேகாவின் பார்வை முழுமையாக பறிபோய் விட்டது.

இந்நிலையில், அரசியல் தலைவர் ஒருவரை சந்திக்க, நேற்று புதிய தலைமை செயலகத்துக்கு தேவேந்திரன் வந்தார். பேரவை கூட்டத்தொடர் நடப்பதால் யாரையும் சந்திக்க முடியாமல் ஏமாற்றத்துடன் சென்றார்.

தேவேந்திரன் கூறுகையில், “என் மகள் நன்றாக இருந்தாள். காய்ச்சல் என்று மாத்திரை கொடுத்ததால் இப்படி ஆகிவிட்டது. அறுவை சிகிச்சைக்கு முன்பாவது ஓரளவு பார்வை இருந்தது. இப்போது அதுவும் பறிபோய் விட்டது. கண்ணில் லென்ஸ் வைத்தால் பார்வை திரும்ப கிடைத்துவிடும் என்று தனியார் கண் மருத்துவமனையில் தெரிவித்தனர். அதற்கு ரூ.1.5 லட்சம் செலவாகும். என் குழந்தையை முதல்வர்தான் காப்பாற்ற வேண்டும்” என்று கண்ணீருடன் கூறினார்